തിരുവനന്തപുരം: ജില്ലാ പഞ്ചായത്തിലെ പുതിയ ഭരണസമിതിയുടെ ജൈവസമൃദ്ധി ബജറ്റ് അഞ്ചിനെതിരെ 20 വോട്ടുകള്‍ക്ക് പാസായി.
'പഴയ വീഞ്ഞും കുപ്പി'യുമായിരുന്നു ചര്‍ച്ചകളിലെമ്പാടും നിറഞ്ഞു നിന്നത്. ബജറ്റവതരണത്തില്‍ 50 മിനിട്ടോളം പ്രസിഡന്റിന്റെ ആമുഖം നീണ്ടെന്ന ആരോപണവും മാനദണ്ഡം മറികടന്ന് പ്രസിഡന്റ് തയാറാക്കിയ ബജറ്റ് വൈസ് പ്രസിഡന്റ് വായിക്കുകയായിരുന്നുവെന്നും ചര്‍ച്ചകളില്‍ ആക്ഷേപമുയര്‍ന്നു. ബജറ്റ് ഏകപക്ഷീയമോ ഒറ്റക്ക് ക്രമീകരിക്കേണ്ടതോ അല്ലെന്നും കൂട്ടായ ചര്‍ച്ചകള്‍ക്കൊടുവില്‍ തയാറാക്കുന്നതുമാണെന്നാന്നുമായിരുന്നു പ്രസിഡന്റ് വി.കെ മധുവിന്റെ മറുപടി. ബജറ്റ് പ്രസംഗം നീണ്ടത് ബജറ്റിന്റെ മികവ് കൊണ്ടാണെന്നും പഴയ വീഞ്ഞിനായി കുറേ തപ്പിയെങ്കിലും ഗുണമേന്‍മയുള്ള ഒന്നും കണ്ടത്തൊനായില്ലെന്നും പ്രസിഡന്റ് പറഞ്ഞു. ഗുണഭോക്തൃ കമ്മിറ്റികളുടെ മറവില്‍ ബിനാമി പ്രവര്‍ത്തനം അനുവദിക്കില്ല. ഇ-ടെണ്ടര്‍ പൂര്‍ണമായും നടപ്പിലാക്കുമെന്നും അദ്ദേഹം പറഞ്ഞു. വ്യത്യാസങ്ങള്‍ക്കപ്പുറം കൂട്ടായി പ്രവര്‍ത്തിച്ചാലെ ജനകീയ ബജറ്റ് പ്രാവര്‍ത്തികമാക്കാന്‍ സാധിക്കൂവെന്ന് ജില്ലാ പഞ്ചായത്ത് വൈസ് പ്രസിഡന്റ് അഡ്വ.എ.ശൈലിജാ ബീഗം പറഞ്ഞു.
കാര്‍ഷിക മേഖലക്ക് ദിശാബോധം നല്‍കിയ ബജറ്റാണിതെന്നും വിഷരഹിത പച്ചക്കറി കൂടുതലായി ജനത്തിനത്തെിക്കാനുള്ള തീരുമാനം സ്വാഗതാര്‍ഹമാണെന്നും ബി.പി മുരളി പറഞ്ഞു.
ബജറ്റില്‍ പുതിയയാതൊന്നുമില്ലെന്നായിരുന്നു ബി.ജെ.പിയുടെ ശോഭനകുമാരിയുടെ ആരോപണം.
ബി.പി.എല്‍ പട്ടികയില്‍ ഉള്‍പ്പെട്ടവര്‍ക്കായി പദ്ധതികളൊന്നും ബജറ്റില്‍ ഉള്‍ക്കൊള്ളിച്ചിട്ടില്ലെന്ന് രമാകുമാരി പറഞ്ഞു. അഭ്യസ്ഥ വിദ്യരായ ചെറുപ്പക്കാര്‍ തൊഴില്‍ നല്‍കാനുതകുന്ന സംരംഭങ്ങളും ബജറ്റില്‍ പറയുന്നില്ല. കഴിഞ്ഞ പദ്ധതികളുടെ തുടര്‍ച്ചയാണ് പുതിയ ബജറ്റില്‍ അധികവും. വായന പ്രോത്സാഹിപ്പിക്കാന്‍ ആവശ്യമുയരുമ്പോഴും ലൈബ്രേറിയന്‍മാര്‍ക്കുള്ള ഓണറേറിയം വര്‍ധിപ്പിക്കുന്നതും പരിഗണിച്ചിട്ടില്ലെന്ന് രാമാകുമാരി കൂട്ടിച്ചേര്‍ത്തു. സ്‌കൂളുകളിലെ വായനശാലകള്‍ക്ക് ബജറ്റില്‍ പ്രാധാന്യം ലഭിച്ചിട്ടില്ലെന്ന് ജോസ് ലാല്‍ പറഞ്ഞു. കഴിഞ്ഞ അഞ്ച് വര്‍ഷം തദ്ദേശ സ്ഥാപനങ്ങളെ സര്‍ക്കാര്‍ ഞെരുക്കിഞെരുക്കിയെന്ന ആരോപണം ശരിയല്ലെന്നും ഗുണഭോക്തൃകമ്മിറ്റികള്‍ നിര്‍ത്തലാക്കിയതിനോട് യോജിക്കുന്നുവെന്നും ആനാട് ജയന്‍ പറഞ്ഞു. നല്ലതിനെ നല്ലതെന്ന് പറയാന്‍ തയ്യാറാകണമെന്നും അദ്ദേഹം പറഞ്ഞു.
സംയോജിത പദ്ധതികള്‍ക്ക് കൂടുതല്‍ ഊന്നല്‍ നല്‍കണമെന്ന് ചര്‍ച്ചയില്‍ ആവശ്യമുയര്‍ന്നു. ജില്ലയിലെ ടൂറിസം സാധ്യതകളെ പ്രയോജനപ്പെടുത്തുന്നതിന് പദ്ധതികളാവിഷ്‌കരിക്കണം. ജില്ലാ പഞ്ചായത്തിന്റെ നേതൃത്വത്തില്‍ എഫ്.എം റേഡിയോകള്‍ ആരംഭിക്കണം. സാക്ഷരതാ കേന്ദ്രങ്ങള്‍ക്ക് സ്വന്തമായി കെട്ടിടങ്ങള്‍ നല്‍കാന്‍ നടപടി സ്വീകരിക്കണമെന്നും ആവശ്യമുയര്‍ന്നു.