നിലമ്പൂര്‍: ആദിവാസി യുവതി 14 ദിവസം മാത്രം പ്രായമുള്ള കുഞ്ഞിനെ കൊലപ്പെടുത്താനുണ്ടായ സാഹചര്യമൊരുക്കിയത് ഐ.ടി.ഡി.പിയും പൊലിസുമാണെന്ന് ചാലിയര്‍ പഞ്ചായത്ത് പ്രസിഡന്റ് പി.ടി ഉസ്മാന്‍. അധികൃതര്‍ ഉണര്‍ന്നു പ്രവര്‍ത്തിച്ചിരുന്നുവെങ്കില്‍ ഇത്തരത്തില്‍ പര്യവസാനിക്കില്ലായിരുന്നു.
ഇരു വകുപ്പുകളും അനാസ്ഥ കാണിച്ചു. ശാരദ ഗര്‍ഭിണിയാണെന്ന് ആരോഗ്യവകുപ്പ് സ്ഥിരീകരിച്ചിരുന്നു. തുടര്‍ന്ന് വാര്‍ഡംഗവും കോളനിയിലെ പ്രൊമോട്ടറും കോളനിയിലെ യുവതി അവിഹിത ഗര്‍ഭം ധരിച്ചിട്ടുണ്ടെന്ന വിവരം ഐ.റ്റി.ഡി.പിയെയും വനിതാ പൊലിസിനെയും അറിയിക്കുകയും ചെയ്തു.
എന്നിട്ടും ഇവര്‍ സംഭവം അന്വേഷിക്കാന്‍ പോലും എത്തിയില്ലെന്നും പ്രസിഡണ്ട് പറഞ്ഞു. നിലമ്പൂര്‍ സി.ഐയുടെ നേതൃത്വത്തില്‍ പൊലിസ് രാത്രി എത്തിയതുകൊണ്ടാണ് മൃഗങ്ങള്‍ കടിച്ചുവലിക്കാതെ കുഞ്ഞിന്റെ മൃതദേഹമെങ്കിലും കിട്ടാനായത്.
കോളനിയിലെ നിര്‍മാണ പ്രവര്‍ത്തനം മാത്രമാണ് ഐ.റ്റി.ഡി.പി ചെയ്യുന്നത്. ആദിവാസികളുടെ ക്ഷേമവും സുരക്ഷയും നോക്കുന്നില്ല. കോളനിയിലെ ഊരുകൂട്ടം നല്‍കിയ പരാതിയെങ്കിലും അന്വേഷിച്ചിരുന്നുവെങ്കില്‍ ഇത്തരത്തില്‍ പര്യവസാനിക്കില്ലായിരുന്നുവെന്നും ഉസ്മാന്‍ പറഞ്ഞു.