പൂച്ചാക്കല്‍:തെരുവ് നായ്ക്കള്‍ രണ്ട് ആടുകളെ കടിച്ചു കൊന്നു.തൈക്കാട്ടുശ്ശേരി പഞ്ചായത്ത് പതിനഞ്ചാം വാര്‍ഡ് പൂതേകാട്ടു വീട്ടില്‍ മേരിക്കുട്ടിയുടെ ആടുകളെയാണ് കൊന്നത്.
രാത്രിയില്‍ തെരുവ് നായ്ക്കള്‍ കൂട്ടത്തോടെ എത്തി കൂട് തകര്‍ത്താണ് ആടുകളെ ആക്രമിച്ചത്.മറ്റൊരു ആടിന്റെ അകിട് നായ്ക്കള്‍ കടിച്ചെടുത്തു.പതിനയ്യായിരം രൂപയോളം നഷ്ടം വന്നതായി ഉടമ പറഞ്ഞു.
മറ്റ് ആടുകളെ അടുത്തുള്ള മൃഗാശുപത്രിയില്‍ എത്തിച്ച് പ്രതിരോധ കുത്തിവെപ്പെടുത്തു. തൈക്കാട്ടുശ്ശേരി പഞ്ചായത്ത് പ്രദേശങ്ങളില്‍ തെരുവ് നായ്ക്കളുടെ ശല്യം രൂക്ഷമായിരിക്കുകയാണ്.വളര്‍ത്തു മൃഗങ്ങളെ തെരുവ് നായ്ക്കള്‍ കൊന്നൊടുക്കുന്നത് നിത്യ സംഭവമായി മാറിയിരിക്കുന്നു.കഴിഞ്ഞ ദിവസങ്ങളില്‍ ഈ മേഖലളില്‍ നിരവധി ആടുകളെയാണ് ആക്രമിച്ച് കൊന്നത്.
രണ്ടാം വാര്‍ഡ് ഉളവൈപ്പില്‍ അധികാരത്ത് പാറയില്‍ ഉമ്മച്ചന്‍ തരകന്റെ പത്തോളം ആടുകളേയും,പ്രാണശ്ശേരി വേലായുധന്റെ മൂന്ന് ആടുകളെയും കടിച്ചു കൊന്നു.തെരുവ് നായ്ക്കളുടെ ശല്യം വര്‍ധിച്ചതോടെ ക്ഷീര കര്‍ഷകര്‍ ഭീതിയിലാണ്.
ഇതേ തുടര്‍ന്ന് പകല്‍ സമയം പുരയിടങ്ങളില്‍ വളര്‍ത്തു മൃഗങ്ങളെ കെട്ടിയിടാന്‍ സാധിക്കാതെ കൂട്ടില്‍ തന്നെ വളര്‍ത്തുകയാണ് ചെയ്യുന്നത്.
തൈക്കാട്ടുശ്ശേരി പഞ്ചായത്ത് പ്രദേശങ്ങളില്‍ തെരുവ് നായ്ക്കളുടെ ശല്യം നാള്‍ക്ക് നാള്‍ വര്‍ധിച്ചിട്ടും അധികൃതര്‍ യാതൊരു നടപടിയും സ്വീകരിച്ചിട്ടില്ല.
ഇതിനിടയില്‍ എം.ഡി.യു.പി.സ്‌കൂളിലെ വിദ്യാര്‍ത്ഥികളും അധ്യാപകരും മാര്‍ച്ചും പ്രതിഷേധവും നടത്തി.കൂടാതെ പ്രദേശത്തെ നിരവധി സാംസ്‌കാരിക കൂട്ടായ്മകളും പഞ്ചായത്ത് പടിക്കല്‍ ധര്‍ണ്ണയും സമരവും നടത്തിരുന്നു.