തൃശൂര്‍: ചരിത്രപ്രസിദ്ധമായ കൂട്ടംകുളം സമരത്തിന്റെ മണ്ണില്‍ അയിത്താചരണത്തിന്റെ ഭാഗമായി കൂടല്‍മാണിക്യം ദേവസ്വം അധികൃതര്‍ അടച്ച പൊതുവഴി തുറന്നുകൊടുക്കണമെന്ന ആര്‍.ഡി.ഒ. ഉത്തരവ് നടപ്പാക്കണമെന്ന് ആവശ്യപ്പെട്ട് വഴി തുറക്കല്‍ സമരസമിതിയുടെ നേതൃത്വത്തില്‍ ഇന്നു വൈകിട്ട് ആറിന് ഇരിങ്ങാലക്കുട ആല്‍ത്തറയ്ക്കല്‍ പൊതുയോഗം ചേരും. കാലങ്ങളായി പെരുവല്ലിപ്പാടത്തെ നൂറുകണക്കിനു ദലിതു കുടംബങ്ങളുടെ ആശ്രയമായിരുന്ന വഴി ധിക്കാരപൂര്‍വം കോണ്‍ക്രീറ്റ് കാലുകളും മറ്റും സ്ഥാപിച്ച് തടയുകയായിരുന്നു. ഇതിനെതിരേ വിവിധ ദലിത് സംഘടനകളും രാഷ്ട്രീയസംഘടനകളും പ്രക്ഷോഭവുമായി മുന്നോട്ടുവന്നു. എന്നിട്ടും നിയമവിരുദ്ധമായി അടച്ച വഴി തുറക്കാന്‍ അധികൃതര്‍ തയ്യാറായിരുന്നില്ല.
നഗരസഭയും ജാതിവിവേചനത്തിനു കൂട്ടുനില്‍ക്കുകയായിരുന്നു. ശവങ്ങളും മത്സ്യങ്ങളും കൊണ്ടുപോകുന്നതുകൊണ്ടാണ് വഴിയടച്ചതെന്ന അസത്യപ്രചാരണവും ദേവസ്വം അധികൃതര്‍ നടത്തി.
ത്യാഗോജ്വലമായ സമരത്തിലൂടെ വഴി നടക്കാനുള്ള അവകാശം നേടിയെടുത്ത ദലിതരെയും വഴി ഉപയോഗിക്കുന്ന ഇതര സമുദായക്കാരെയും അവഹേളിക്കുന്ന തരത്തിലാണ് അധികൃതര്‍ നിലപാടെടുടത്തത്. ഇതിനെതിരെ ദലിത് സംഘടനാ പ്രവര്‍ത്തകര്‍ മേലധികാരികള്‍ക്ക് പരാതി നല്‍കിയതിനെ തുടര്‍ന്ന് തഹസില്‍ദാര്‍ റിപ്പോര്‍ട്ട് തയ്യാറാക്കി ആര്‍.ഡി.ഒയ്ക്ക് കൈമാറി.
നടവഴി പുറംപോക്കാണെന്നു വ്യക്തമാക്കിയ റിപ്പോര്‍ട്ടിന്റെ അടിസ്ഥാനത്തില്‍ എത്രയും പെട്ടെന്ന് വഴി തുറന്നുകൊടുക്കണമെന്ന് സബ് ഡിവിഷണല്‍ മജിസ്‌ട്രേറ്റ് ഉത്തരവിട്ടു.
എന്നാല്‍ ആ ഉത്തരവിനെ മറികടക്കാന്‍ ദേവസ്വം തടസവാദങ്ങള്‍ ഉന്നയിച്ചെങ്കിലും വിജയിച്ചില്ല. പൊതുവഴിയിലെ തടസങ്ങള്‍ നീക്കം ചെയ്യണമെന്ന ആര്‍.ഡി.ഒ. ഉത്തരവുണ്ടായത് പ്രക്ഷോഭങ്ങളുടെ വിജയമാണെന്ന് സമിതി നേതാക്കള്‍ പറഞ്ഞു.