ലഖ്‌നൗ: പൗരത്വ നിയമത്തിലും ഡല്‍ഹിയിലെ മുസ്‌ലിം വംശഹത്യയിലും മുസ്‌ലിംകള്‍ക്ക് തണലേകിയ സിഖുകാര്‍ക്ക് തിരികെ മധുരം നല്‍കി യു.പിയിലെ മുസ്‌ലിംകള്‍. ഉത്തര്‍പ്രദേശ് സഹാറന്‍പൂരിലെ സിഖ്-മുസ്‌ലിം ഭൂമിത്തര്‍ക്കം പരിഹരിച്ചു.

ഗുരുദ്വാരയ്ക്ക് സമീപമുള്ള ഭൂമി 2010ല്‍ സിഖുകാര്‍ വാങ്ങിയിരുന്നു. ഗുരുദ്വാര സമുച്ചയം വിപുലീകരിക്കാനായി അവിടത്തെ പഴയ കെട്ടിടങ്ങള്‍ പൊളിച്ചുമാറ്റി. ഇതില്‍ ഒരു പള്ളിയുമുണ്ടായിരുന്നു. ഇതോടെ കേസ് സുപ്രിം കോടതിയിലെത്തി. എന്നാല്‍, പുതിയ സാഹചര്യത്തില്‍ സിഖ് സമൂഹം മുസ്‌ലിം സമുദായത്തോട് കാണിക്കുന്ന സമീപനത്തിന് നന്ദി പറഞ്ഞാണ് ഭൂമിത്തര്‍ക്കം ഉപേക്ഷിക്കാന്‍ മുസ്‌ലിംകള്‍ തയാറായത്. പകരം  മുസ്‌ലിംകള്‍ക്ക് സിഖുകാര്‍ മറ്റൊരു ഭൂമി നല്‍കും. പത്തുവര്‍ഷമായി തുടരുന്ന പശ്ചിമ യു.പിയിലെ ഭൂമി പ്രശ്‌നമാണ് ഇതോടെ തീരുമാനമായത്.  

പൗരത്വ പ്രതിഷേധങ്ങളിലും ശേഷം നടന്ന മുസ്‌ലിം വംശഹത്യയിലും വലിയ സഹകരണവും സഹായങ്ങളുമാണ് സിഖുകാര്‍ നടത്തിയത്. ഷഹീന്‍ ബാഗില്‍ സമരം ചെയ്യുന്നവര്‍ക്കു ഭക്ഷണം നല്‍കാന്‍ തന്റെ ഫ്‌ളാറ്റ് സിഖുകാരന്‍ വിറ്റിരുന്നു. ഇതിനു പുറമേ സംഘ്പരിവാര്‍ ആസുത്രിതമായി ഡല്‍ഹിയില്‍ നടത്തിയ മുസ്‌ലിം വംശഹത്യയില്‍  മുറിവേറ്റവരെ സഹായിക്കാന്‍ ആദ്യം മുന്നോട്ടുവന്നതും അവരായിരുന്നു.

ഗുരുദ്വാരയില്‍നിന്ന് ഒരു കിലോമീറ്റര്‍ അകലയാണ് മസ്ജിദ് നിര്‍മിക്കുന്നത്. പള്ളിയുടെ ശിലാസ്ഥാപനത്തില്‍ പ്രാദേശിക സിഖ് നേതാക്കളും പങ്കെടുത്തു. ഇരുപക്ഷവും തമ്മിലുള്ള മധ്യസ്ഥതയില്‍ സഹാറന്‍പൂര്‍ ജില്ലാ ഭരണകൂടവും പ്രധാന പങ്കുവഹിച്ചു.