ന്യൂഡല്‍ഹി: മദ്യരാജാവ് വിജയ്മല്യയുടെ കേസില്‍ രൂക്ഷമായ വിമര്‍ശനവുമായി സുപ്രിം കോടതി. തെലങ്കാനക്കാരന്റെ സാരിമോഷണക്കേസിന്റെ വിധി പ്രസ്താവത്തിലാണ് മല്യയെ പരോക്ഷമായി സുപ്രിം കോടതി വിമര്‍ശിച്ചത്.

കോടികള്‍ തിരിമറി നടത്തിയവര്‍ സുഖിച്ചുവാഴുന്ന നാട്ടില്‍ അഞ്ച് സാരി മോഷ്ടിച്ചവര്‍ക്ക് ഒരുവര്‍ഷം ജയില്‍ ശിക്ഷ വിധിക്കുന്നു എന്നാണ് കോടതി പറഞ്ഞത്. ഹൈദരാബാദിലെ ഛെ ഏലിയാ എന്നയാളുടെ ഭാര്യയുടെ ഒരുവര്‍ഷം മുന്‍പുള്ള പരാതിയില്‍ വിധി പറയുമ്പോഴാണ് സുപ്രിം കോടതി ചീഫ് ജസ്റ്റിസ് ജെ.എസ് ഖെഹാര്‍ മല്യയെ പരോക്ഷമായി വിമര്‍ശിച്ചത്.  

തെലങ്കാന പൊലിസ് സമര്‍പ്പിച്ച കുറ്റപത്രത്തില്‍ സംസ്ഥാനത്തുടനീളം നിരവധി സാരി മോഷണങ്ങള്‍ നടന്നുവരുന്നുണ്ടെന്നും ഇയാള്‍ അതിലെ കണ്ണിയാണെന്നും പറയുന്നുണ്ട്. എന്നാല്‍ പ്രതിക്കെതിരേ തെളിവുകളില്ലെന്ന് പ്രതിഭാഗം ആരോപിച്ചു. കേസ് വിധി പറയാനായി ബുധനാഴ്ചത്തേക്ക് മാറ്റിവെച്ചു. നേരത്തേ ഹൈദരാബാദ് ഹൈകോടതി ഇയാള്‍ക്ക് ഒരുവർഷം തടവുശിക്ഷ വിധിച്ചിരുന്നു.

കിങ്ഫിഷര്‍ എയര്‍ലൈനുവേണ്ടി 9000 കോടി രൂപ ഇന്ത്യയിലെ വിവിധ ബാങ്കുകളില്‍ നിന്ന് ലോണെടുത്തശേഷം മല്യ ലണ്ടനിലേക്ക് കടന്നുകളയുകയായിരുന്നു. ഇന്ത്യയില്‍ ലുക്ക്ഔട്ട് നോട്ടീസ് പുറപ്പെടുവിച്ചതിനോട് മല്യ കഴിഞ്ഞ ഒരുവര്‍ഷമായി യു.കെയില്‍ താന്‍ സുരക്ഷിതനാണ് എന്നാണ് പ്രതികരിച്ചത്.