കൊച്ചി: തോപ്പുംപടി അരൂജാസ് സ്‌കൂളിലെ വിദ്യാര്‍ഥികള്‍ക്ക് പരീക്ഷയെഴുതാന്‍ കോടതിയുടെ കനിവ്. സ്‌കൂളിലെ 28 പത്താംക്ലാസ് വിദ്യാര്‍ഥികള്‍ക്ക് നാളെ മുതലുള്ള മൂന്ന് പരീക്ഷകള്‍ എഴുതാനാണ് ഹൈക്കോടതി അനുമതി നല്‍കിയത്. ഉപാധികളോടെയാണ് പരീക്ഷ എഴുതാന്‍ അനുവദിച്ചത്. നാളെയും 14,18 തീയതികളില്‍ നടക്കുന്ന പരീക്ഷകളും എഴുതാം.

സി.ബി.എസ്.ഇയുടെ അംഗീകാരം ഇല്ലാത്തതിനെ തുടര്‍ന്നാണ് ഈ കുട്ടികള്‍ക്ക് എസ്.എസ്.എല്‍.സി പരീക്ഷ എഴുതാന്‍ കഴിയാതിരുന്നത്. ഈ സാഹചര്യത്തില്‍ രക്ഷിതാക്കള്‍ ഹൈക്കോടതിയെ സമീപിക്കുകയായിരുന്നു. ഹര്‍ജി പരിഗണിച്ച കോടതി കഴിഞ്ഞദിവസം സ്‌കൂളുകള്‍ക്ക് അംഗീകാരം നല്‍കുന്ന വിഷയത്തില്‍ സിബിഎസ്ഇയെ രൂക്ഷമായി വിമര്‍ശിച്ചിരുന്നു.

ആറുസെന്റിലാണ് സ്‌കൂള്‍ പ്രവര്‍ത്തിക്കുന്നത്. 350 കുട്ടികള്‍ക്ക് ഒരു ശുചിമുറി മാത്രമാണ് ഉള്ളത്. മാത്രമല്ല സി.ബി.എസ്.ഇ നിഷ്‌കര്‍ഷിക്കുന്ന നോംസ് അനുസരിച്ചുള്ള അടിസ്ഥാന സൗകര്യങ്ങള്‍ ഇല്ലെന്നും സിബിഎസ്ഇ കോടതിയില്‍ വ്യക്തമാക്കി.