ആലക്കോട്: വീടു കേന്ദ്രീകരിച്ചു അനധികൃതമായി വൈന്‍ നിര്‍മാണം നടത്തിയ വയോധികനെ എക്‌സൈസ് സംഘം അറസ്റ്റു ചെയ്തു. ആലക്കോട് ടൗണില്‍ കൊട്ടാരം റോഡിനു സമീപം താമസിക്കുന്ന തെക്കേല്‍ തോമസിനെയാ(72)ണ് ആലക്കോട് എക്‌സൈസ് ഇന്‍സ്‌പെക്ടര്‍ പി ശ്രീരാജും സംഘവും അറസ്റ്റു ചെയ്തത്. വീട് കേന്ദ്രീകരിച്ചു വന്‍തോതില്‍ വൈന്‍ നിര്‍മാണവും വില്‍പ്പനയും നടക്കുന്നതായി രഹസ്യവിവരം ലഭിച്ചതു പ്രകാരമാണ് എക്‌സൈസ് പരിശോധന നടത്തിയത്. നൂറുലിറ്റര്‍ വൈന്‍, വാഷ്, അന്‍പതോളം കുപ്പികള്‍ തുടങ്ങിയവ പിടിച്ചെടുത്തു. വിവാഹ ആഘോഷങ്ങള്‍ക്കും മറ്റും ഇയാള്‍ മദ്യമെത്തിച്ചു കൊടുത്തുവരികയായിരുന്നുവെന്നു എക്‌സൈസ് അറിയിച്ചു. മുന്തിരി, ഗോതമ്പ്, പഞ്ചസാര എന്നിവ ഉപയോഗിച്ചായിരുന്നു നിര്‍മാണം. എക്‌സൈസ് അസി. ഇന്‍സ്‌പെക്ടര്‍ എം.എം രാജുവിന്റെ നേതൃത്വത്തിലാണ് റെയ്ഡ് നടത്തിയത്.