കാഞ്ഞങ്ങാട്: നിരോധനം ലംഘിച്ചു പാത ഉപരോധിച്ച കേസില്‍ വാറണ്ട് പ്രതിയായ എം.പിയും നേതാക്കളും കോടതിയില്‍ കീഴടങ്ങി. തുടര്‍ന്ന് ഇവര്‍ ജാമ്യത്തിലിറങ്ങി. സി.പി.എം കേന്ദ്ര കമ്മിറ്റി അംഗം പി കരുണാകരന്‍ എം.പി അടക്കമുള്ള 17 പേരാണു കേസില്‍ കോടതിയില്‍ കീഴടങ്ങി ജാമ്യത്തിലിറങ്ങിയത്. ദേശീയ തൊഴിലുറപ്പ് യൂനിയന്റെ( സി.ഐ.ടി.യു)ന്റെ നേതൃത്വത്തില്‍ ഹൊസ്ദുര്‍ഗ് മിനി സിവില്‍ സ്റ്റേഷന്‍ ഉപരോധ സമരത്തിന്റെ ഭാഗമായി നിരോധനം ലംഘിച്ചു പാതയില്‍ മാര്‍ഗ തടസം സൃഷ്ടിച്ചുവെന്ന കേസിലാണ് എം.പി ഉള്‍പ്പടെയുള്ള നേതാക്കള്‍ക്ക് ഹൊസ്ദുര്‍ഗ് ജുഡിഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി(ഒന്ന്) അറസ്റ്റ് വാറണ്ട് പുറപ്പെടുവിച്ചത്.
തൃക്കരിപ്പൂര്‍ മുന്‍ എം.എല്‍.എ കെ കു ഞ്ഞിരാമന്‍, സി.പി.എം ജില്ലാ കമ്മിറ്റിയംഗം കെ കണ്ണന്‍ നായര്‍ ഉള്‍പ്പടെയുള്ളവരാണു പ്രതികളായത്. 2014 മാര്‍ച്ചിലാണ് കേസിനാസ്പദമായ സംഭവം നടന്നത്. ഇവര്‍ കോടതിയില്‍ ഹാജരായി ജാമ്യത്തിലിറങ്ങി യതോടെ കേസ് പരിഗണിക്കുന്നത് ഏപ്രില്‍ 22 ലേക്ക് കോടതി മാറ്റി വച്ചു.