കല്‍പ്പറ്റ: മാനന്തവാടി-വള്ളിയൂര്‍കാവ് റോഡിലെ മദ്യശാല പൂട്ടണമെന്നാവശ്യപ്പെട്ട് ആദിവാസി അമ്മമാര്‍ നടത്തുന്ന സമരം നാനൂറ് ദിനങ്ങള്‍ പിന്നിട്ടു.
സമരം തുടങ്ങി വര്‍ഷം ഒന്ന് കഴിഞ്ഞിട്ടും ആദിവാസികളെ അവഗണിക്കുന്ന ഭരണകൂട, രാഷ്ട്രീയ നിലപാടില്‍ പ്രതിഷേധിച്ച് സമരം ശക്തമാക്കാനൊരുങ്ങുകയാണിവര്‍.
ഇതിന്റെ ഭാഗമായി ഇന്ന് രാവിലെ ഒന്‍പതിന് ഗാന്ധി പ്രതിമക്ക് മുന്നില്‍ കൂട്ട വിലാപവും തുടര്‍ന്ന് എം.എല്‍.എ ഓഫിസിന് മുന്നില്‍ ശയന പ്രദക്ഷിണം, നഗരസഭാ ഓഫിസിന് മുന്നില്‍ പ്രതിഷേധ ധര്‍ണ എന്നിവ സംഘടിപ്പിക്കും. പ്രതിഷേധ പരിപാടികള്‍ അഡ്വ. റഷീദ് പടയന്‍ ഉദ്ഘാടനം ചെയ്യും.
ആദിവാസി പീഡനങ്ങള്‍ക്കും കൊലപാതകങ്ങള്‍ക്കും അസ്വാഭാവിക മരണങ്ങള്‍ക്കും കാരണമായ മദ്യശാലക്കെതിരേ ആദിവാസികള്‍ നടത്തുന്ന സമരം കണ്ടില്ലെന്ന് നടിക്കുന്ന എം.എല്‍.എമാരായ ഒ.ആര്‍ കേളു, ഐ.സി ബാലകൃഷ്ണന്‍, മുന്‍സിപ്പല്‍ ചെയര്‍മാന്‍, ബ്ലോക്ക്, ഗ്രാമപഞ്ചായത്ത് പ്രസിഡന്റ് എന്നിവരുടെ നിലപാട് നിന്ദ്യവും അപലപനീയവുമാണെന്ന് വാര്‍ത്താസമ്മേളനത്തില്‍ പങ്കെടുത്ത മാക്ക പയ്യംമ്പള്ളി, കമല, ശാന്തകുമാരി കണിയാമ്പറ്റ, മജീബുറഹ്മാന്‍ എന്നിവര്‍ പറഞ്ഞു.
ജില്ലാ കലക്ടര്‍ അടച്ചുപൂട്ടിയ ശേഷം കോടതിയുടെ താല്‍കാലിക സ്‌റ്റേയുടെ പിന്‍ബലത്തില്‍ പ്രവര്‍ത്തിക്കുന്ന മദ്യശാല പൂട്ടിക്കുന്നതിന് സമാന ചിന്താഗതിക്കാരായ സാമൂഹ്യ, രാഷ്ട്രീയ സംഘടനകളുടെ നേതൃത്വത്തില്‍ സമരം ശക്തമാക്കാനും ഇതു സംബന്ധിച്ച് കേന്ദ്ര, സംസ്ഥാന എക്‌സൈസ് കമ്മിഷണര്‍മാര്‍, കേന്ദ്ര എക്‌സൈസ് മന്ത്രി എന്നിവര്‍ക്ക് പരാതി നല്‍കാനും സമരസമിതി തീരുമാനിച്ചു.