ചെറുതോണി: പ്രളയക്കെടുതിയില്‍ തകര്‍ന്ന ഇടുക്കിയിലെ കാര്‍ഷിക മേഖലയുടെയും നഷ്ടമായ ജീവനോപാധികള്‍ തിരികെ പിടിക്കുന്നതിനും ഉതകുന്ന പദ്ധതികള്‍ ഉള്‍ക്കൊള്ളിച്ച് പ്രത്യേക പാക്കേജ് അനുവദിക്കാത്തത് ആശങ്കാജനകമാണെന്ന് റോഷി അഗസ്റ്റിന്‍ എം.എല്‍.എ. പറഞ്ഞു.
വീടും സ്ഥലവും നഷ്ടപ്പെടുകയും ജീവനോപാധികള്‍ ഇല്ലാതാകുകയും ചെയ്ത നിരവധിയാളുകളുടെ പ്രതീക്ഷയായിരുന്നു സംസ്ഥാന ബജറ്റ്. നിലവില്‍ പാക്കേജുകളുള്ള കുട്ടനാടിനും വയനാടിനും തുടര്‍ പദ്ധതികള്‍ പ്രഖ്യാപിച്ചപ്പോള്‍ പോലും ഇടുക്കിയ്ക്ക് അര്‍ഹമായ പരിഗണന ലഭിച്ചില്ല.പ്രളയക്കെടുതിയെ തുടര്‍ന്ന് തകര്‍ന്നടിഞ്ഞ ജില്ലയിലെ റോഡുകള്‍ ഗതാഗതയോഗ്യമാക്കുന്നതിന് പ്രത്യേക പരിഗണന നല്‍കേണ്ടതായിരുന്നു.
പ്രളയബാധിത പഞ്ചായത്തുകള്‍ക്കളിലെ കൃഷി പുനരുജ്ജീവനത്തിന് 2500 കോടി രൂപ പ്രത്യേക സഹായം അനുവദിക്കുമെന്ന പ്രഖ്യാപനം ആശ്വാസകരമാണ്. എന്നാല്‍ 770 കോടി രൂപ പദ്ധതിയില്‍ നിന്നും 282 കോടി രൂപ കേന്ദ്രാവിഷ്തൃത പദ്ധതിയില്‍ നിന്നും 200 കോടി രൂപ വിദേശ ധനസഹായ പദ്ധതികളില്‍ നിന്നും ലഭിക്കുമെന്ന പ്രതീക്ഷയിലാണ് പ്രഖ്യാപനം. ഇതോടൊപ്പം തദ്ദേശ ഭരണ സ്ഥാപനങ്ങളുടെ പദ്ധതിയില്‍ നിന്ന് ആയിരം കോടി രൂപയെങ്കിലും കൃഷിക്കായി നീക്കിവയ്ക്കുമെന്നും ഇങ്ങനെ 2500 കോടി രൂപയാണ് ലക്ഷ്യമിടുന്നത്. എന്നാല്‍ വിവിധ പദ്ധതികളില്‍ നിന്നും മാറ്റി വയ്ക്കുന്നതിന് പകരം സര്‍ക്കാര്‍ ഖജനാവില്‍ നിന്നും കാര്‍ഷിക മേഖലയുടെ പുനരുദ്ധാരണത്തിന് തുക നീക്കി വച്ച് പുനരുദ്ധാരണം ഉറപ്പാക്കുകയായിരുന്നു വേണ്ടിയിരുന്നത്.
ജില്ലയിലെ കാര്‍ഷിക മേഖലയുടെ പുനര്‍ നിര്‍മ്മാണത്തിനും അടിസ്ഥാന വികസനത്തിനുമായി ധനകാര്യ മന്ത്രിയുടെ ബജറ്റ് ചര്‍ച്ചയുടെ മറുപടി പ്രസംഗത്തിലൂടെയെങ്കിലും ഇടുക്കിയ്ക്ക് പ്രത്യേക പാക്കേജ് പ്രതീക്ഷിക്കുന്നതായി എം.എല്‍.എ. പറഞ്ഞു.