ഒറ്റപ്പാലം: കാത്തിരിപ്പിനൊടുവില്‍ ഫെബ്രുവരി 11ന് ഒറ്റപ്പാലം നഗരസഭാ ബസ് സ്റ്റാന്‍ഡ് കം ഷോപ്പിങ് കോംപ്ലക്‌സ് തദ്ദേശ വകുപ്പ് മന്ത്രി എ.സി മൊയ്തീന്‍ ഉദ്ഘാടനം നിര്‍വഹിക്കും. 2005ല്‍ ശിലാസ്ഥാപനം നടത്തിയെങ്കിലും കാര്യമായ നിര്‍മാണ പ്രവര്‍ത്തനങ്ങള്‍ നടന്നില്ല. 2012ല്‍ യു.ഡി.എഫ് സര്‍ക്കാരിന്റെ കാലത്ത് വീണ്ടുമൊരു നിര്‍മാണോദ്ഘാടനം പി.കെ കുഞ്ഞാലിക്കുട്ടി നിര്‍വഹിക്കുകയും ചെയ്തു. ശേഷം നിര്‍മാണ പ്രവൃത്തികള്‍ ദ്രുതഗതിയില്‍ ആരംഭിക്കുകയുമായിരുന്നു. ബസ് സ്റ്റാന്‍ഡ് കോപ്ലക്‌സിന്റെ കെട്ടിടവും അനുബന്ധ സൗകര്യങ്ങളും പൂര്‍ത്തീകരിക്കാന്‍ 2017 ജനുവരി 30വരേയുള്ള സമയം വീണ്ടും നീട്ടികൊടുക്കുകയായിരുന്നു നഗരസഭ.
നിര്‍മാണ പ്രവര്‍ത്തികള്‍ വര്‍ഷങ്ങള്‍ നീണ്ടതോടെ കോടികളുടെ നഷ്ടമാണ് ബസ്റ്റാന്‍ഡ് നിര്‍മ്മാണവുമായി ബന്ധപ്പെട്ട് നഗരസഭയ്ക്ക് ഉണ്ടായത്. 21 കോടി രൂപ ചെലവിലാണ് നിര്‍മാണം പൂര്‍ത്തിയാക്കിയത്. പലിശയിനത്തില്‍ മാത്രം ലക്ഷങ്ങളുടെ നഷ്ടമാണ് നഗരസഭയ്ക്ക് ഉണ്ടായിട്ടുള്ളത്. 13 വര്‍ഷം കാത്തിരിപ്പിനൊടുവില്‍ നിര്‍മാണം പൂര്‍ത്തിയായതോടെ കോംപ്ലക്‌സിലെ മുറികള്‍ ലേലം ചെയ്‌തെങ്കിലും, ഏതാനും മുറികള്‍ മാത്രമാണ് ലേലത്തില്‍ വ്യാപാരികള്‍ എടുക്കാന്‍ തയാറായത്.
നഗരസഭാ ബസ് സ്റ്റാന്‍ഡ് ഷോപ്പിങ് കോംപ്ലക്‌സിന്റെ ഉദ്ഘാടനത്തോടനുബന്ധിച്ച് ഒറ്റപ്പാലം നഗരസഭയുടെ നേതൃത്വത്തില്‍ സ്വാഗത സംഘം രൂപീകരിച്ചു. ഉദ്ഘാടന പരിപാടി ഉത്സവമാക്കാന്‍ സ്വാഗത സംഘം തീരുമാനിച്ചു. ഫെബ്രുവരി 11ന് മൂന്നിന് നഗരസഭയുടെ മുന്നില്‍നിന്ന് ഘോഷയാത്ര ആരംഭിക്കും. ഘോഷയാത്രയില്‍ വിവിധ സംഘടനകളുടെ ബാനറില്‍ കലാരൂപങ്ങള്‍ അണിനിരക്കും. എന്‍.സി.സി, എന്‍.എസ്.എസ്, സ്‌കൗട്ട്, എസ്.പി.സി എന്നിവരും പരിപാടിയില്‍ പങ്കെടുക്കും. ജനപ്രതിനിധികള്‍, നഗരസഭ ജീവനക്കാര്‍, കുടുംബശ്രീ പ്രവര്‍ത്തകര്‍, ആശ പ്രവര്‍ത്തകര്‍, ഹരിത കര്‍മ്മ സേന തുടങ്ങിയവരും ഘോഷയാത്രയില്‍ അണിചേരും. ഒറ്റപ്പാലം ബസ്സ് സ്റ്റാന്റില്‍ നടക്കുന്ന ഉദ്ഘാടന പരിപാടിയില്‍ പ്രത്യേകം സംഗീത പരിപാടിയും ഒരുക്കും. സംഘാടക സമിതി ചെയര്‍മാനായി നഗരസഭ ചെയര്‍മാന്‍ എന്‍.എം നാരായണന്‍ നമ്പൂതിരിയും, ജനറല്‍ കണ്‍വീനറായി നഗരസഭ സെക്രട്ടറി എച്ച് സീനയേയും തിരഞ്ഞെടുത്തു.
പരിപാടിയുടെ വിജയത്തിനായി വിവിധ സബ് കമ്മിറ്റികളെയും തിരഞ്ഞെടുത്തു. പ്രോഗ്രാം കമ്മിറ്റി ചെയര്‍മാന്‍ കെ. രത്‌നമ്മ, കണ്‍വീനര്‍ ഹെല്‍ത്ത് സൂപ്രണ്ട് മണികണ്ഠന്‍, പ്രചാരണ കമ്മിറ്റി ചെയര്‍മാന്‍ ഇ. പ്രഭാകരന്‍, കണ്‍വീനര്‍ റവന്യൂ ഇന്‍സ്‌പെക്ടര്‍ അയ്യപ്പന്‍, സ്റ്റേജ് മൈക്ക് കമ്മിറ്റി ചെയര്‍മാന്‍ ടി. ലത, കണ്‍വീനര്‍ റവന്യൂ ഉദ്യോഗസ്ഥന്‍ ഉണ്ണികൃഷ്ണന്‍, റിസപ്ഷന്‍ കമ്മിറ്റി ചെയര്‍മാന്‍ ബി. സുജാത, കണ്‍വീനര്‍ ജനറല്‍ സൂപ്രണ്ട് ഷെറിന്‍, വെല്‍ഫയര്‍ കമ്മിറ്റി ചെയര്‍മാന്‍ കെ.ബി ശശികുമാര്‍ ,കണ്‍വീനര്‍ സുരേഷ്, കള്‍ച്ചറല്‍ പോഗ്രാം കമ്മിറ്റി ചെയര്‍മാന്‍ സുജി വിജയന്‍, കണ്‍വീനര്‍ റവന്യൂ സൂപ്രണ്ട് ജമീല എന്നിവരെയും യോഗം തിരഞ്ഞെടുത്തു. യോഗത്തില്‍ ടി.പി പ്രദീപ് കുമാര്‍, ഫായിസ്, രാജഗോപാലന്‍, ഷംസുദീന്‍, സുനില്‍ സംസാരിച്ചു.