പനമരം: പരക്കുനിയിലെ ഏകാധ്യാപക വിദ്യാലയത്തില്‍ കുട്ടികള്‍ പഠിക്കുന്നത് തറയിലിരുന്ന്. സ്‌കൂളിന്റെ പരിതാപ അവസ്ഥയില്‍ പഞ്ചായത്തിന് മൗനമാണ്. പുറംവേദനയും മറ്റും മിക്കവര്‍ക്കുമുണ്ട്. ഇക്കാര്യത്തില്‍ വിദ്യാഭ്യാസ വകുപ്പും അനങ്ങാപ്പാറ നയത്തിലാണ്. ഒന്നു മുതല്‍ നാലാം ക്ലാസുവരെ 20 ആദിവാസി കുട്ടികളാണ് പനമരം പരക്കുനിയിലുള്ളത്. കസേരയും ബെഞ്ചും ഇല്ലാത്തതിനാല്‍ ഷീറ്റ് വിരിച്ചാണ് കുട്ടികള്‍ ഇരിക്കുന്നത്. തറയിലെ തണുപ്പേറ്റ് കുട്ടികള്‍ക്ക് പുറംവേദനയും മറ്റസുഖങ്ങളും ഉണ്ടാകുന്നു. അധ്യാപികയ്ക്കും നല്ല കസേരയും മേശയുമില്ല. പഞ്ചായത്ത് അധികാരികള്‍ വിചാരിച്ചാല്‍ കസേരയും മറ്റും ഒരുക്കി കൊടുക്കാവുന്നതേയുള്ളു. എന്നാല്‍ ആരും ഇങ്ങോട്ട് തിരിഞ്ഞു നോക്കുന്നില്ല. പ്രളയബാധിതരെ സഹായിക്കാന്‍ നിരവധി സന്നദ്ധ സംഘടനകള്‍ ഇവിടെ എത്തിയിരുന്നെങ്കിലും ആരും സ്‌കൂളിനെ പരിഗണിച്ചില്ല. ഏത് നിമിഷവും ഇടിഞ്ഞു വീഴാവുന്ന കെട്ടിടത്തിലാണ് സ്‌കൂള്‍ പ്രവര്‍ത്തിക്കുന്നത്. ചുവരും തറയും പല ഭാഗത്തും തകര്‍ന്ന് കിടക്കുകയാണ്. ഇതിനെല്ലാം പരിഹാരം കാണേണ്ട പഞ്ചായത്തിന്റെ അനങ്ങാപ്പാറ നയം നാട്ടുകാരില്‍ കടുത്ത പ്രതിഷേധത്തിനിടയാക്കുന്നുണ്ട്.