തിരുവനന്തപുരം: പ്രളയം നല്‍കിയ പാഠങ്ങളുമായി ആരോഗ്യ ജാഗ്രതാ പദ്ധതിക്ക് നാളെ തുടക്കമാകും.
പദ്ധതിയുടെ ഈ വര്‍ഷത്തെ ഉദ്ഘാടനം മുഖ്യമന്ത്രി നാളെ തിരുവനന്തപുരത്ത് നിര്‍വഹിക്കും. ഒട്ടേറെ വെല്ലുവിളികള്‍ നേരിട്ട 2018ന്റെ അനുഭവസമ്പത്തുമായാണ് ഈ വര്‍ഷത്തേക്കുള്ള പകര്‍ച്ചവ്യാധി നിയന്ത്രണ പ്രവര്‍ത്തനങ്ങള്‍ ആരംഭിക്കുന്നതെന്ന് മന്ത്രി കെ.കെ ശൈലജ വാര്‍ത്താസമ്മേളനത്തില്‍ പറഞ്ഞു.
ദുരന്തനിവാരണ പ്രവര്‍ത്തനങ്ങളിലെ ഒത്തൊരുമയോടുള്ള പ്രവര്‍ത്തനഫലമായി ദുരന്തതീക്ഷ്ണതയും മരണങ്ങളും കുറയ്ക്കാന്‍ കഴിഞ്ഞു. സംസ്ഥാനത്ത് ഇപ്പോഴും പ്രധാന ആരോഗ്യപ്രശ്‌നമായി നിലനില്‍ക്കുന്ന പകര്‍ച്ചവ്യാധികള്‍ നിയന്ത്രിക്കുന്നതിന് ഫലപ്രദമായ പ്രവര്‍ത്തനങ്ങളാണ് നടക്കുന്നത്.

കേന്ദ്ര ആരോഗ്യ വകുപ്പിന്റെ ആഭിമുഖ്യത്തില്‍ ഇന്റഗ്രേറ്റഡ് ഹെല്‍ത്ത് ഇന്‍ഫര്‍മേഷന്‍ പ്ലാറ്റ്‌ഫോം (ഐ.എച്ച്.ഐ.പി) നടപ്പിലാക്കാനുള്ള തയാറെടുപ്പുകള്‍ ആരംഭിച്ചിട്ടുണ്ട്. ഇത് രോഗനിരീക്ഷണത്തിനും രോഗം പൊട്ടിപ്പുറപ്പെടുന്നത് മുന്‍കൂട്ടി കാണാനും കൂടുതല്‍ ഉപകാരപ്രദമാകുമെന്നാണ് കരുതപ്പെടുന്നത്. പ്രതിദിനം പ്രതിരോധം എന്ന മുദ്രാവാക്യം മുന്‍നിര്‍ത്തിയായിരിക്കും ആരോഗ്യ ജാഗ്രതാ പദ്ധതിയുടെ പ്രവര്‍ത്തനമെന്നും മന്ത്രി പറഞ്ഞു.

ആരോഗ്യ വകുപ്പ് അഡീഷനല്‍ ചീഫ് സെക്രട്ടറി രാജീവ് സദാനന്ദന്‍, ആരോഗ്യ വകുപ്പ് പ്രിന്‍സിപ്പല്‍ സെക്രട്ടറി ഡോ.രാജന്‍ എന്‍. കോബ്രഗഡെ, ആരോഗ്യ വകുപ്പ് ഡയരക്ടര്‍ ഡോ.ആര്‍.എല്‍ സരിത, അഡീഷനല്‍ ഡയരക്ടര്‍ ഡോ. മീനാക്ഷി വാര്‍ത്താസമ്മേളനത്തില്‍ പങ്കെടുത്തു.