കൊല്ലം:ദേശീയ ജൂനിയര്‍ വനിതാ ഹോക്കി ചാംപ്യന്‍ഷിപ്പ് ബി ഡിവിഷനില്‍ പട്യാല ഹോക്കി അസോസിയേഷന്‍ ജേതാക്കളായി.
ഫൈനല്‍ മത്സരത്തില്‍ ടൂര്‍ണമെന്റില്‍ ഇതുവരെ തോല്‍വി അറിഞ്ഞിട്ടില്ലാത്ത ഭോപാലിനെ പരാജയപ്പെടുത്തിയാണ് പട്യാല ജേതാക്കളായത്.സെമിയില്‍ ആന്ധ്രാ ഹോക്കി അസോസിയേഷനെ തോല്‍പ്പിച്ചു പട്യാല ഫൈനലില്‍ എത്തിയപ്പോള്‍ ആസാമിനെ പരാജയപ്പെടുത്തിയാണ് ഭോപ്പാല്‍ കലാശപ്പോരിന് യോഗ്യത നേടിയത്. എട്ടാം മിനുട്ടില്‍ കൗര്‍ നവജ്യോത് ഏല്‍പ്പിച്ച പ്രഹരത്തിലൂടെ പട്യാല ആദ്യ ഗോള്‍ നേടി. ഗോള്‍ വഴങ്ങിയ ശേഷം ചില മുന്നേറ്റങ്ങള്‍ ഭോപ്പാല്‍ നടത്തിയെങ്കിലും പട്യാല പ്രതിരോധം ശക്തമാക്കി. പതിമൂന്നാം മിനുട്ടില്‍ തരന്‍പ്രീത് കൗര്‍ പട്ട്യാലയുടെ രണ്ടാം ഗോള്‍ സ്‌കോര്‍ ചെയ്തു. 39-ാം മിനുട്ടില്‍ ഭോപ്പാല്‍ മീനു റാണിയിലൂടെ തിരിച്ചടിച്ചുവെങ്കിലും പിന്നീട് കളി പട്യാല വരുതിയിലാക്കുകയായിരുന്നു.