പാലക്കാട്: സംസ്ഥാന ബജറ്റില്‍ പ്രഖ്യാപിച്ച ജില്ലയിലെ പദ്ധതികള്‍ തുടങ്ങാനുള്ള നടപടികള്‍ ത്വരിതപ്പെടുത്താന്‍ ജില്ലാ കലക്ടര്‍ ഡി. ബാലമുരളിയുടെ അധ്യക്ഷതയില്‍ ചേര്‍ന്ന ജില്ലാ വികസനസമിതി യോഗത്തില്‍ തീരുമാനിച്ചു. ഓരോ വകുപ്പുകള്‍ക്കും അനുവദിച്ച പദ്ധതികള്‍ക്ക്് വിശദമായ പദ്ധതി റിപ്പോര്‍ട്ട് (ഡി.പി.ആര്‍) തയാറാക്കി നല്‍കാന്‍ ഉദ്യോഗസ്ഥര്‍ക്ക് ജില്ലാ കലക്ടര്‍ നിര്‍ദേശം നല്‍കി. അടുത്ത വികസന സമിതി യോഗത്തിനു മുന്നോടിയായി ബന്ധപ്പെട്ട വകുപ്പുകള്‍ റിപ്പോര്‍ട്ട് ജില്ലാ കലക്ടര്‍ക്ക് സമര്‍പ്പിക്കാന്‍ നിര്‍ദേശിച്ചു. പൊതുമരാമത്ത് നിരത്ത്, കെട്ടിടം വിഭാഗം എക്‌സിക്യൂട്ടീവ് എന്‍ജിനീയര്‍മാര്‍ പ്രത്യേക ശ്രദ്ധപുലര്‍ത്തണമെന്നും കാലതാമസം കൂടാതെ പ്രവൃത്തികള്‍ ആരംഭിക്കണമെന്നും യോഗം ആവശ്യപ്പെട്ടു.
പ്രളയത്തില്‍ വീട് നഷ്ടപ്പെട്ട മുഴുവന്‍ ആളുകള്‍ക്കും വാസയോഗ്യമായ വീടില്ലാത്തവര്‍ക്കും ലൈഫ് മിഷന്‍ പദ്ധതിയില്‍ ഉള്‍പ്പെടുത്തി വീട് നല്‍കാന്‍ ഒന്നാംഘട്ട നടപടികള്‍ പൂര്‍ത്തിയാക്കിയതായി കലക്ടര്‍ അറിയിച്ചു. അനര്‍ഹരായവരെ ഒഴിവാക്കുന്നതിനായി 17 അംഗങ്ങളുള്ള രണ്ട് അപ്പീല്‍ കമ്മിറ്റികള്‍ കലക്ടറുടെ നിര്‍ദേശപ്രകാരം പരിശോധന നടത്തുന്നുണ്ട്. ആഴ്ചയില്‍ 50 അപ്പീലുകളാണ് പരിശോധിക്കുന്നത്. പട്ടാമ്പി താലൂക്ക് ആശുപത്രിക്ക് അനുദിച്ച സ്ഥലം ഏറ്റെടുക്കാനുള്ള നടപടികള്‍ അന്തിമഘട്ടത്തിലാണെന്ന് ജില്ലാ മെഡിക്കല്‍ ഓഫിസര്‍ (ആരോഗ്യം) കെ.പി റീത്ത അറിയിച്ചു. സ്ഥലം ലഭിക്കുന്ന മുറയ്ക്ക് എം.എല്‍.എ ഫണ്ടില്‍നിന്ന്് പണം ചെലവഴിച്ച് ഡയാലിസിസ് ബ്ലോക്ക് പൂര്‍ത്തിയാക്കുമെന്നും മുഹമ്മദ് മുഹ്‌സിന്‍ എം.എല്‍.എ പറഞ്ഞു.
പട്ടാമ്പിയില്‍ കൈയേറ്റക്കാരില്‍ നിന്നും വീണ്ടെടുത്ത ജില്ലാ വ്യവസായ കേന്ദ്രത്തിന്റെ ഭൂമിയില്‍ 35 സെന്റ് ഭൂമി പട്ടാമ്പിയില്‍ ഫയര്‍ സ്റ്റേഷന്‍ കെട്ടിടത്തിനായി നല്‍കാനുള്ള നിര്‍ദേശം സമര്‍പ്പിക്കാന്‍ വ്യവസായ വകുപ്പ് മാനെജറോട് ജില്ലാ കലക്ടര്‍ നിര്‍ദേശിച്ചു. അംബേദ്ക്കര്‍ സ്വാശ്രയ ഗ്രാമം പദ്ധതി പ്രകാരം 15 ഗ്രാമങ്ങള്‍ ഏറ്റെടുത്ത് നിര്‍മാണം പുരോഗമിക്കുന്നുണ്ടെന്ന് പട്ടികജാതി വികസന ഓഫീസര്‍ അറിയിച്ചു. കൊപ്പം അഭയകേന്ദ്രത്തില്‍ താമസിക്കുന്നവര്‍ക്ക് റേഷന്‍കാര്‍ഡ് അടക്കം ജീവനോപാധി കണ്ടെത്താനുള്ള നടപടികള്‍ സ്വീകരിക്കാന്‍ പട്ടികവര്‍ഗ വികസന ഓഫീസര്‍ക്ക് നിര്‍ദേശം നല്‍കി.
പട്ടികജാതി വകുപ്പ് നടപ്പാക്കുന്ന സാമൂഹിക പഠനമുറിയുടെയും 2018-19 സാമ്പത്തിക വര്‍ഷത്തില്‍ ജില്ലയില്‍ വിവിധ വകുപ്പുകള്‍ വഴി നടപ്പാക്കുന്ന പദ്ധതികളുടെ പ്രവര്‍ത്തന പുരോഗതിയും യോഗം വിലയിരുത്തി. മികച്ച പ്രവര്‍ത്തനം കാഴ്ചവെയ്ക്കുന്ന ഉദ്യോഗസ്ഥര്‍ക്ക് ജില്ലാ ഭരണകൂടം റിപബ്‌ളിക് ദിനത്തില്‍ പുരസ്‌ക്കാരം നല്‍കുമെന്ന് ജില്ലാ കലക്ടര്‍ അറിയിച്ചു. എം.എല്‍.എമാരായ കെ.വി വിജയദാസ്, കെ.ഡി പ്രസേനന്‍, മുഹമ്മദ് മുഹ്‌സിന്‍, ജില്ലാ കലക്ടര്‍ ഡി. ബാലമുരളി, ഒറ്റപ്പാലം സബ് കലക്ടര്‍ ജെറോമിക് ജോര്‍ജ്, പ്ലാനിങ് ഓഫിസര്‍ ഏലിയാമ്മ നൈനാന്‍, വിവിധ വകുപ്പ് മേധാവികള്‍ വികസന സമിതി യോഗത്തില്‍ പങ്കെടുത്തു.