കക്കട്ടില്‍: പുറമേരി പഞ്ചായത്തിലെ വിലാതപുരത്ത് കഴിഞ്ഞ ദിവസമുണ്ടായ രാഷ്ട്രീയ സംഭവങ്ങളുമായി ബന്ധപ്പെട്ട് കുറ്റ്യാടി പഞ്ചായത്തിലെ വടയത്തുണ്ടായ സംഘര്‍ഷത്തെ കുറിച്ചും പൊലിസ് വാഹനം തകര്‍ക്കുകയും ചെയ്ത സംഭവത്തിലെ മുഴുവന്‍ പ്രതികളെയും അറസ്റ്റ് ചെയ്യണമെന്ന് കുറ്റ്യാടി ബ്ലോക്ക് കോണ്‍ഗ്രസ് കമ്മിറ്റി. സംഭവത്തില്‍ പ്രതികളായ സി.പി.എം-ഡി.വൈ.എഫ്.ഐ പ്രവര്‍ത്തകരെ കേസില്‍ നിന്നൊഴിവാക്കാന്‍ ശ്രമം നടക്കുകയാണ്.
സി.പി.എം നേതാക്കളുടെ മക്കളെയും പ്രതികളായ സര്‍ക്കാര്‍ ജീവനക്കാരെയും കേസില്‍ നിന്നൊഴിവാക്കാന്‍ സി.പി.എമ്മിന് പൊലിസ് കൂട്ടുനില്‍ക്കുകയാണ്. പൊലിസിനെ തടയുകയും പൊതുമുതല്‍ നശിപ്പിക്കുകയും ചെയ്തവര്‍ക്കെതിരേ പൊലിസ് നടപടി ശക്തമാക്കണമെന്നും കോണ്‍ഗ്രസ് ആവശ്യപ്പെട്ടു.
വിലാതപുരം സംഘര്‍ഷവുമായി ബന്ധപ്പെട്ട കേസില്‍ പ്രതിയായ ഡി.വൈ.എഫ്.ഐ പ്രവര്‍ത്തകന്‍ സുനീഷ് വടയത്തുള്ള ബന്ധുവീട്ടില്‍ എത്തിയതറിഞ്ഞ് കുറ്റ്യാടി പൊലിസ് സ്ഥലത്തെത്തി സുനീഷിനെ കസ്റ്റഡിയിലെടുത്ത് പൊലിസ് ജീപ്പില്‍ കൊണ്ടു പോകുന്നതിനിടയിലാണ് വാഹനത്തിന് നേരെ കല്ലേറുണ്ടായതും ജീപ്പിന്റെ ചില്ല് തകര്‍ന്നതും.
യോഗത്തില്‍ മരക്കാട്ടേരി ദാമോദരന്‍ അധ്യക്ഷനായി. കെ.പി.സി.സി നിര്‍വാഹക സമിതി അംഗം വി.എം ചന്ദ്രന്‍, ഡി.സി.സി സെക്രട്ടറി അഡ്വ. പ്രമോദ് കക്കട്ടില്‍, ശ്രീജേഷ് ഊരത്ത്, കെ. സജീവന്‍, പി.കെ അജിത്ത് സംസാരിച്ചു.