വെസ്റ്റ്ബാങ്ക്: ഉച്ചഭാഷിണി വഴിയുള്ള ബാങ്ക് വിളി നിര്‍ത്തലാക്കാനൊരുങ്ങി ഇസ്രാഈല്‍. ഇതിന്റെ നിയമനിര്‍മാണത്തിന് ഇസ്രാഈല്‍ പാര്‍ലമെന്റ് പ്രാഥമിക അനുമതി നല്‍കി. പള്ളികളുടെ സമീപത്ത് താമസിക്കുന്നവരുടെ ജീവിത നിലവാരം മെച്ചപ്പെടുത്തുക എന്ന ഉദ്ദേശത്തോടെയാണ് ബില്‍ പാസാക്കുന്നതെന്നാണ് സര്‍ക്കാരിന്റെ അവകാശവാദം.
എന്നാല്‍ നിയമനിര്‍മാണത്തിലൂടെ സര്‍ക്കാര്‍ മുസ്‌ലിങ്ങളുടെ മതസ്വാതന്ത്ര്യത്തിനുള്ള അവകാശത്തെ ബലി കഴിക്കുകയാണെന്ന് പ്രതിപക്ഷം ആരോപിച്ചു.
നിശ്ചിത സമയത്തേക്കാണ് ഉച്ചഭാഷിണി വിലക്കിയിരിക്കുന്നത്. ജനവാസ കേന്ദ്രങ്ങളില്‍ ഉച്ചഭാഷിണി ഉപയോഗിക്കുന്നവരില്‍ നിന്ന് ഒരു ലക്ഷത്തി എണ്‍പതിനായിരം രൂപ പിഴ ഈടാക്കണമെന്നും ബില്‍ വ്യവസ്ഥ ചെയ്യുന്നു. പുലര്‍ച്ചെയുള്ള ബാങ്ക് വിളി പള്ളികള്‍ക്ക് സമീപത്ത് താമസിക്കുന്നവരുടെ ഉറക്കത്തെ തടസപ്പെടുത്തുകയാണെന്നും ബില്ലിനെ അനുകൂലിക്കുന്നവര്‍ പറയുന്നു.
എന്നാല്‍ രാജ്യത്തെ മൊത്തം ജനസംഖ്യയുടെ 20ശതമാനം മാത്രമുള്ള മുസ്‌ലിങ്ങളോട് വിവേചനം കാണിക്കാനും അടിച്ചമര്‍ത്താനാണ് ബില്ലിലൂടെ വലതുപക്ഷ പാര്‍ട്ടികള്‍ ശ്രമിക്കുന്നതെന്ന് പ്രതിപക്ഷം ആരോപിച്ചു. ഭരണപക്‌ഴും പ്രതിപക്ഷവും തമ്മിലുള്ള ശക്തമായ വാഗ്വാദങ്ങള്‍ക്കു ശേഷമാണ് ബില്ലിന് അംഗീകാരം ലഭിച്ചത്.
പാര്‍ലമെന്റിന്റെ പ്രാഥമികാനുമതി നേടിയ ബില്‍ കൂടുതല്‍ പരിശോധനകള്‍ക്കായി പ്രത്യേക സമിതിയുടെ പരിഗണനക്ക് വിട്ടു. ഇതിന് ശേഷമാകും അവസാനഘട്ട തെരഞ്ഞെടുപ്പ് നടക്കുക. ബില്‍ നിയമമായാല്‍ കിഴക്കന്‍ ജറുസലേമും നിരോധത്തിന്റെ പരിധിയില്‍ വരും. എന്നാല്‍ മുസ്‌ലികളുടെ പുണ്യ സ്ഥലമായ അല്‍ അഖ്‌സ പള്ളി നിരോധത്തിന്റെ പരിധിയില്‍ വരില്ലെന്നാണ് സൂചന.