കൊച്ചി: കൊച്ചിയില്‍നിന്ന് ആഴക്കടല്‍ മത്സ്യബന്ധനത്തിനുപോയ പത്തംഗസംഘം ഒമാനില്‍ പിടിയിലായി. കന്യാകുമാരി സ്വദേശികളായ 10 പേരെയും ഇവര്‍ സഞ്ചരിച്ചിരുന്ന ബോട്ടുമാണ് അതിര്‍ത്തി ലംഘനത്തിന്റെ പേരില്‍ ഒമാന്‍ അധികൃതര്‍ പിടികൂടിയത്.
ഇവരുടെ മോചനത്തിന് ഇടപെടണമെന്നാവശ്യപ്പെട്ട് ഇന്റര്‍നാഷണല്‍ ഫിഷര്‍മെന്‍ ഡെവലപ്പ്‌മെന്റ് ട്രസ്റ്റ് (ഇന്‍ഫിഡെറ്റ് ) വിദേശകാര്യ മന്ത്രാലയത്തിനും തമിഴ്‌നാട് മുഖ്യമന്ത്രിക്കും ഒമാനിലെ ഇന്ത്യന്‍ എംബസിക്കും നിവേദനം നല്‍കി.
കന്യാകുമാരി സ്വദേശിയായ ആന്റണി സേവ്യറിന്റെ ഉടമസ്ഥതയിലുള്ള കെവിന്‍ ബ്രൈറ്റ് എന്ന ബോട്ടില്‍ ഏപ്രില്‍ നാലിനാണ് പത്തംഗസംഘം കൊച്ചിയില്‍നിന്ന് പുറപ്പെട്ടത്.
ആഴക്കടലില്‍ മത്സ്യബന്ധനം നടത്തവെയാണ് ഇവരുടെ ബോട്ട് അതിര്‍ത്തി ലംഘിക്കാന്‍ ഇടയായത്. ശക്തമായ കാറ്റില്‍ വഴിതെറ്റിയാണ് ഒമാന്‍ അതിര്‍ത്തിയിലേക്ക് കടന്നതെന്ന് വിശദീകരിച്ചെങ്കിലും കഴിഞ്ഞ 26ന് ഒമാന്‍ അധികൃതര്‍ ഇവരുടെ അറസ്റ്റ് രേഖപ്പെടുത്തുകയായിരുന്നു.
ബോട്ടുടമ ആന്റണി സേവ്യറിനെ കൂടാതെ അമല്‍രാജ്, ആന്റോ തദേവൂസ്, ആന്റണി രാജ്, ആരോക്കിയം, ബെന്‍സിഗര്‍, ജോണ്‍ ക്ലീറ്റസ്, ജോസഫ് ബസ്‌കി, സില്‍വസ്റ്റര്‍, സുനില്‍ എന്നിവരാണ് ബോട്ടിലുള്ളത്. എല്ലാവരും കന്യാകുമാരി സ്വദേശികളാണ്.