പാലക്കാട്: ജനുവരി ഒന്ന് 2012 മുതല്‍ 28.01.2015 വരെയുള്ള കാലയളവിലെ പി.എസ്.സി വിജ്ഞാപനപ്രകാരമുള്ള അപേക്ഷകളില്‍ ഫോട്ടോയിലുള്ള  ന്യൂനത  (ഫോട്ടോയുടെ താഴെ പേരും ഫോട്ടോ എടുത്ത തീയതിയും വ്യക്തമായി രേഖപ്പെടുത്താത്തത് ) പരിഹരിക്കുന്നതിന് ഏപ്രില്‍ 15 വരെ അവസരം. ഒ.ട്ടി.ആര്‍ പ്രൊഫൈലില്‍ വണ്‍ടൈം സെറ്റില്‍മെന്റ് (ഒ.ട്ടി.എസ്) ലിങ്ക് വഴി ന്യൂനതയില്ലാതെ ഫോട്ടോ ചേര്‍ക്കാം. അല്ലാതെ ചേര്‍ക്കുന്ന ഫോട്ടോകള്‍ പരിഗണിക്കില്ല.  
ലോഗിന്‍ ചെയ്യുമ്പോള്‍ തന്നെ പ്രൊഫൈലില്‍ ഒ.ട്ടി.എസ് ചെയ്യുന്നതിനുള്ള ലിങ്ക് കാണും. ലിങ്കില്‍ ക്ലിക്ക് ചെയ്യുമ്പോള്‍ ഉദ്യോഗാര്‍ഥി സമര്‍പിച്ച അപേക്ഷകളിലെ  ഫോട്ടോകള്‍ ദൃശ്യമാകും. പേരും തീയതിയും രേഖപ്പെടുത്താത്തതും വ്യക്തമല്ലാത്തതുമായ ഫോട്ടോകള്‍ക്കു പകരം വ്യക്തതയുള്ള ഫോട്ടോ അപ്‌ലോഡ് ചെയ്യാം.
ന്യൂനതകളില്ലാത്ത ഫോട്ടോകള്‍ മാറ്റേണ്ടതില്ല. ഒ.ട്ടി.എസ് ഉപയോഗിച്ച് അപ്‌ലോഡ് ചെയ്യുന്ന ഫോട്ടോകള്‍ ഭാവിയില്‍ സമര്‍പിക്കുന്ന അപേക്ഷകള്‍ക്ക് പരിഗണിക്കപ്പെടുകയില്ല.
അതിനാല്‍ നിലവില്‍ പ്രൊഫൈലില്‍ അപ്‌ലോഡ് ചെയ്തിട്ടുള്ള പുതിയ ഫോട്ടോ ന്യൂനതകള്‍ ഉള്ളതാണെങ്കില്‍ അതുകൂടി പ്രൊഫൈലില്‍ നല്‍കിയിട്ടുള്ള ചെയ്ഞ്ച് ഫോട്ടാഗ്രാഫ് ലിങ്കില്‍  ക്ലിക്ക് ചെയ്ത് വ്യക്തമായ ഫോട്ടോ അപ്‌ലോഡ് ചെയ്ത് പരിഹരിക്കണമെന്ന് പി.എസ്.സി.ജില്ലാ ഓഫിസര്‍ അറിയിച്ചു.