അമ്പലപ്പുഴ: മത്സ്യതൊഴിലാളികളും വ്യാപാരികളും തമ്മിലുണ്ടായ സംഘട്ടനത്തില്‍ മൂന്നു പേര്‍ക്ക് പരുക്ക്. വ്യാപാരികളായ ഷെഫീക്ക് (33), അബ്ദുള്‍ സമദ് (44), റിനാസ് (42) എന്നിവര്‍ക്കാണ് പരുക്കേറ്റത്.
ഇവരെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. കഴിഞ്ഞ ദിവസം രാത്രി 10 ഓടെ പറവൂര്‍ ചന്തക്കടവിലായിരുന്നു സംഘര്‍ഷം.
കിലോയ്ക്ക് 200 രൂപ വരെ വിലയുള്ള മത്തി ആദ്യം വന്ന വള്ളങ്ങളില്‍ നിന്നും 65 രൂപ കിലോക്ക് നല്‍കി വ്യാപാരികള്‍ എടുത്തു. പിന്നീട് വന്ന വള്ളത്തിലെ മത്സ്യത്തിന് കിലോക്ക് 45 രൂപ വില പറഞ്ഞതാണ് മത്സ്യതൊഴിലാളികളെ ചൊടിപ്പിച്ചത്.
പിന്നീട് വാക്കുതര്‍ക്കം സംഘട്ടനത്തില്‍ കലാശിക്കുകയായിരുന്നു. മത്സ്യതൊഴിലാളികളായ 10 പേര്‍ക്കെതിരേ പുന്നപ്ര പൊലിസ് കേസെടുത്തു.