മലപ്പുറം: രാഷ്ട്രീയ സംഘര്‍ഷങ്ങള്‍ ഒഴിവാക്കാന്‍ പൊലിസ് കരുതലോടെയും സംയമനത്തോടെയും പ്രവര്‍ത്തിക്കണമെന്നു സംസ്ഥാന മനുഷ്യാവകാശ കമ്മിഷന്‍. പക്ഷപാതവും അനാസ്ഥയും പൊലിസിന്റെ വിശ്വാസ്യത കെടുത്തുമെന്നും കമ്മിഷനംംഗം കെ. മോഹന്‍കുമാര്‍ ഉത്തരവില്‍ പറഞ്ഞു.
താനൂരിലും പരിസരത്തുമായി നടന്ന രാഷ്ട്രീയ സംഘര്‍ഷങ്ങളുടെ ഭാഗമായി വീടുകളും വ്യാപാര സ്ഥാപനങ്ങളും നശിപ്പിച്ചതായുള്ള പത്രവാര്‍ത്തയുടെ അടിസ്ഥാനത്തില്‍ കമ്മിഷന്‍ സ്വമേധയാ രജിസ്റ്റര്‍ ചെയ്ത കേസിലാണ് ഉത്തരവ്. ഇതുകൂടാതെ 41 പേര്‍ ഇതുസംബന്ധിച്ച് കമ്മിഷനില്‍ പരാതി നല്‍കിയിരുന്നു.
മത്സ്യത്തൊഴിലാളികള്‍ തിങ്ങിപ്പാര്‍ക്കുന്ന തീരപ്രദേശമായതിനാല്‍ സംഘര്‍ഷങ്ങള്‍ വളരെവേഗം പടര്‍ന്നുപിടിക്കാറുണ്ടെന്ന് ജില്ലാ കലക്ടര്‍ കമ്മിഷനെ അറിയിച്ചു. കലാപം ആവര്‍ത്തിക്കാതിരിക്കാന്‍ രാഷ്ട്രീയ കക്ഷികളുടെ യോഗം വിളിച്ചിട്ടുണ്ട്. 24 മണിക്കൂറും പ്രവര്‍ത്തിക്കുന്ന പ്രത്യേക കണ്‍ട്രോള്‍ റൂം തുറന്നിട്ടുണ്ടെന്നു ജില്ലാ പൊലിസ് മേധാവിയും കമ്മിഷനെ അറിയിച്ചു. പൊലിസിന്റെ ഭാഗത്തുനിന്നു മോശപ്പെട്ട പെരുമാറ്റം ഉണ്ടായതായി പരാതിക്കാര്‍ കമ്മിഷനെ അറിയിച്ചു. മൊഴിമാറ്റാന്‍ പൊലിസ് നിര്‍ബന്ധിച്ചിട്ടുണ്ട്. പ്രതികളെ രക്ഷിക്കാനും ശ്രമിക്കുന്നു. നാശനഷ്ടത്തിന്റെ ലിസ്റ്റിലും തുകയിലും ക്രമക്കേട് നടന്നിട്ടുണ്ടെന്നും പരാതിക്കാര്‍ ആരോപിച്ചു.
ഒന്നോ രണ്ടോ അക്രമികള്‍ കാരണം ഒരു പ്രദേശമോ വീടോ ആക്രമിക്കപ്പെടുന്നതു നിയമവാഴ്ചയുള്ള സമൂഹത്തിന് അംഗീകരിക്കാനാകില്ലെന്നു കെ. മോഹന്‍കുമാര്‍ ഉത്തരവില്‍ പറഞ്ഞു. നാശനഷ്ടത്തിന്റെ കണക്കില്‍ അപാകതയുണ്ടെന്ന് പരാതിയുള്ളവര്‍ക്ക് കണക്ക് പുനഃപരിശോധിക്കുന്നതിനായി ജില്ലാ കലക്ടര്‍ക്ക് അപേക്ഷ നല്‍കാവുന്നതാണെന്ന് കമ്മിഷന്‍ നിര്‍ദ്ദേശിച്ചു. കലക്ടര്‍ പരാതി പരിശോധിച്ച് നീതിബോധത്തോടെ ഉചിതനടപടികള്‍ സ്വീകരിക്കണമെന്നും കമ്മിഷന്‍ ഉത്തരവിട്ടു.
ഉത്തരവ് ജില്ലാ കലക്ടക്കും ജില്ലാ പൊലിസ് മേധാവിക്കും അയച്ചു.