അടിമാലി: കെ.എസ്.യു ആഹ്വാനം ചെയ്ത പഠിപ്പ് മുടക്ക് സമരത്തില്‍ എം.എസ്.എഫ് പ്രവര്‍ത്തകര്‍ പങ്കെടുക്കാത്തതിനെ ചൊല്ലിയുണ്ടായ തര്‍ക്കം സംഘട്ടനത്തില്‍ കലാശിച്ചു.  ഇന്നലെ സംസ്ഥാന വ്യാപകമായി കെ.എസ്.യു. ആഹ്വാനം ചെയ്തിരുന്ന സമരവുമായി ബന്ധപ്പെട്ടാണ് പ്രശ്‌നങ്ങള്‍ക്ക് തുടക്കം.
അടിമാലി മാര്‍ ബസേലിയോസ് കോളജിലെ കെ.എസ്.യു. പ്രവര്‍ത്തകര്‍  സമര ആഹ്വാനവുമായി  രാവിലെ തന്നെ രംഗത്തെത്തിയിരുന്നു.  
എന്നാല്‍ എം.എസ്.എഫ്   നേതൃത്വത്തിലുള്ള വിദ്യാര്‍ഥികള്‍ പഠിപ്പു മുടക്കിനെ എതിര്‍ത്ത് രംഗത്തെത്തിയതോടെ ചെറിയതോതില്‍ വാക്കേറ്റവും സംഘര്‍ഷാവസ്ഥയും ഉടലെടുത്തു.  ഇതോടെ പൊലിസ് സ്ഥലത്തെത്തി സ്ഥിതിഗതികള്‍ നിയന്ത്രിച്ചു.  
വായനാദിന പരിപാടികള്‍ നടക്കുന്നതിനാല്‍ ഉച്ചയോടെ ക്ലാസുകള്‍ വിടുമെന്ന് പ്രിന്‍സിപ്പല്‍ പൊലിസിനെ അറിയിച്ചിരുന്നു. ഇതിനിടെ 11.30 ഓടെ  അടിമാലി ടൗണില്‍ കോണ്‍ഗ്രസ്-കെ.എസ്.യു പ്രവര്‍ത്തകരുടെ നേതൃത്വത്തില്‍ പോസ്റ്റ് ഓഫീസിലേക്ക് നടത്തിയ മാര്‍ച്ചിനിടെ ടൗണില്‍ വച്ച് ഇരു വിഭാഗങ്ങള്‍ തമ്മില്‍ വീണ്ടും സംഘര്‍ഷമുണ്ടായി. മാര്‍ച്ചിനെ അനുഗമിച്ചിരുന്ന പൊലിസ് ലാത്തി വീശിയാണ് പ്രശ്‌നം അവസാനിപ്പിച്ചത്.
മുന്‍ അടിമലി ഗ്രാമ പഞ്ചായത്ത് അംഗം അനസ് ഇബ്രാഹിം അടക്കമുളള പ്രവര്‍ത്തകര്‍ക്ക് നേരെയാണ് കെ.എസ്.യു -യൂത്ത് കോണ്‍ഗ്രസുകാരുടെ അക്രമണം ഉണ്ടായത്.
 പരുക്കേറ്റ മൂന്ന് എം.എസ്.എഫ്.പ്രവര്‍ത്തകരായ അല്‍ത്താഫ്,സിയാദ്,അസര്‍മുഹമ്മദ് എന്നിവരെ അടിമാലി താലൂക്കാശുപത്രിയില്‍ പ്രവേശിപ്പിച്ചു.
വീണ്ടും  സംഘടിച്ചെത്തിയ കെ.എസ്.യു പ്രവര്‍ത്തകര്‍ കോളജ് അടപ്പിക്കാന്‍ ശ്രമിച്ചെങ്കിലും പ്രതിരോധവുമായ എസ്.എഫ്.ഐ പ്രവര്‍ത്തകര്‍ രംഗത്ത് വന്നത് കോളജില്‍ വീണ്ടണ്ടും സംഘര്‍ഷത്തിന് ഇടായാക്കി.  എസ്.എഫ്.ഐ പ്രവര്‍ത്തകരായ ഷമാസ്,അരുണ്‍ വഴിയാത്രകാരനായ അമല്‍ എന്നിവര്‍ക്കും പരിക്കേറ്റു.
ഏതാനും കെ.എസ്.യു -യൂത്ത് കോണ്‍ഗ്രസ് പ്രവര്‍ത്തകര്‍ക്കും പരുക്കേറ്റു. സംഭവത്തില്‍ പ്രതിഷേധിച്ച് അടിമാലി ടൗണില്‍ യൂത്ത് ലീഗിന്റെ നേത്യത്വത്തില്‍ പ്രകടനവും യോഗവും നടന്നു.