തിരുവനന്തപുരം: തദ്ദേശ സ്ഥാപനങ്ങളുടെ പ്രവര്‍ത്തനങ്ങള്‍ മാതൃകാപരമെന്ന് മുഖ്യമന്ത്രി പിണറായി വിജയന്‍. കേരള ഗ്രാമപഞ്ചായത്ത് അസോസിയഷന്‍ സെമിനാറും സ്വീകരണ സമ്മേളനവും ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
പദ്ധതികള്‍ക്കായി സര്‍ക്കാര്‍ അനുവദിക്കുന്ന ഫണ്ടില്‍ നിന്ന് 40 ശതമാനം ഉല്‍പ്പാദനമേഖലയ്ക്ക് മാറ്റിവെയ്ക്കണം. പക്ഷെ ഇത് കാലങ്ങളായി ആരും ചെയ്യാറില്ലെന്നും അതുകൊണ്ടാണ് കൃഷിയില്‍ ഉല്‍പ്പാദനം കുറയുന്നതെന്നും അദ്ദേഹം ചൂണ്ടിക്കാട്ടി. അടിസ്ഥാനവികസനം ഉറപ്പാക്കുന്നതിന്റെ ഭാഗമായി നവംബറോടുകൂടി സംസ്ഥാനത്ത് എല്ലാ വീടുകളിലും കക്കൂസ് നിര്‍മ്മിച്ചു നല്‍കും. സര്‍ക്കാര്‍ ഇത് ഗൗരവമായാണ് കാണുന്നത്. ഇതിന് തദ്ദേശ സ്ഥാപനങ്ങള്‍ മുന്‍കൈ എടുക്കണം. സ്ത്രീകള്‍ക്കും വിശ്രമിക്കാന്‍ വഴിയോരങ്ങളില്‍ വിശ്രമ കേന്ദ്രങ്ങള്‍, പ്രായമായവര്‍ക്കുവേണ്ടിയുള്ള പകല്‍വീട് പദ്ധതി എന്നിവ ചില പഞ്ചായത്തുകള്‍ നടപ്പാക്കിയിട്ടുണ്ട്. ഇത് മാതൃകാപരമാണെന്നും മുഖ്യമന്ത്രി അഭിപ്രായപ്പെട്ടു.
പഞ്ചായത്ത് ഭവനില്‍ നടന്ന പരിപാടിയില്‍ കെ.ജി.പി.എ പ്രസിഡന്റ് അഡ്വ.കെ.തുളസി ടീച്ചര്‍ അധ്യക്ഷത വഹിച്ചു. പ്രതിപക്ഷ നേതാവ് രമേഷ് ചെന്നിത്തല,
ആരോഗ്യ മന്ത്രി കെ.കെ.ശൈലജ ടീച്ചര്‍, വൈദ്യുതി മന്ത്രി കടകംപള്ളി സുരേന്ദ്രന്‍, ഗ്രാമവികസന മന്ത്രി കെ.ടി.ജലീല്‍ എന്നിവര്‍ പങ്കെടുത്തു.