വടകര: എസ്.എസ്.എല്‍.സി പരീക്ഷയില്‍ വടകര മേഖലയിലെ സ്‌കൂളുകള്‍ക്ക് മികച്ച വിജയം. നിരവധി വിദ്യാലയങ്ങളില്‍പരീക്ഷയെഴുതിയ മുഴുവന്‍ പേരും വിജയിച്ചു. മടപ്പള്ളി ഗവണ്‍മെന്റ് ഗേള്‍സ് ഹൈസ്‌കൂളില്‍ പരീക്ഷയെഴുതിയ മുഴുവന്‍ വിദ്യാര്‍ഥികളും വിജയിച്ചു. ചോമ്പാല്‍ ഉപജില്ലയില്‍ നൂറ് ശതമാനം പേര്‍ എസ്.എസ്.എല്‍.സിക്കു വിജയിച്ച ഏക വിദ്യാലയമാണിത്. 41 വിദ്യാര്‍ഥികള്‍ മുഴുവന്‍ വിഷയത്തിലും എ പ്ലസ് നേടി.
മേമുണ്ട ഹയര്‍ സെക്കന്‍ഡറി സ്‌കൂള്‍ പരീക്ഷക്കിരുത്തിയ 758 പേരില്‍ മുഴുവന്‍ വിദ്യാര്‍ഥികളെയും വിജയിപ്പിച്ച് മികവ് തുടര്‍ന്നു. 111 പേര്‍ക്ക് എല്ലാ വിഷയത്തിലും എ പ്ലസുണ്ട്. ജില്ലയില്‍ ഏറ്റവും കൂടുതല്‍ പേരെ പരീക്ഷക്കിരുത്തി മുഴുവന്‍ പേരെയും വിജയിപ്പിച്ച വിദ്യാലയം കൂടിയാണ് മേമുണ്ട. വടകര സെന്റ് ആന്റണീസ് ഹൈസ്‌കൂളില്‍ പരീക്ഷയെഴുതിയ 270 പേരില്‍ മുഴുവന്‍ പേരും വിജയിച്ചു. 75 വിദ്യാര്‍ഥികള്‍ക്ക് എ പ്ലസുണ്ട്. മണിയൂര്‍ പഞ്ചായത്ത് ഗവണ്‍മെന്റ് ഹയര്‍ സെക്കന്‍ഡറി സ്‌കൂള്‍, റഹ്്മാനിയ്യ എച്ച്.എസ്.എസ് ആയഞ്ചേരി, ശ്രീനാരായണ എച്ച്.എസ്.എസ് വടകര, ഗവ എച്ച്.എസ്എസ് പുത്തൂര്‍, വടകര സംസ്‌കൃതം ഹൈസ്‌കൂള്‍ എന്നീ വിദ്യാലയങ്ങളിലും പരീക്ഷക്കിരുത്തിയ മുഴുവന്‍ വിദ്യാര്‍ഥികളെയും വിജയിക്കാനായി.
വില്യാപ്പള്ളി എം.ജെ വി.എച്ച് എസ് സ്‌കൂളില്‍ ഒരു വിദ്യാര്‍ഥി യോഗ്യത നേടാത്തതിനാല്‍ നൂറു ശതമാനം നഷ്ടമായി. 539 വിദ്യാര്‍ഥികള്‍ പരീക്ഷക്കിരുന്ന ഇവിടെ 538 പേര്‍ ഉപരിപഠനത്തിന് യോഗ്യത നേടി. 70 വിദ്യാര്‍ഥികള്‍ മുഴുവന്‍ വിഷയത്തിലും എ പ്ലസ് നേടി.
പുതുപ്പണം ജെ.എന്‍.എം ജി.എച്ച്.എസ്.എസില്‍ പരീക്ഷക്കിരുന്ന 317 പേരില്‍ 316 വിദ്യാര്‍ഥികള്‍ ഉപരിപഠനത്തിന് യോഗ്യത നേടി. 41 പേര്‍ക്ക് എല്ലാ വിഷയത്തിലും എ പ്ലസ് ലഭിച്ചു.
323 പേരെ പരീക്ഷക്കിരുത്തിയ വടകര എം.യു.എം സ്‌കൂളില്‍ നിന്ന് 317 പേര്‍ ഉപരിപഠനത്തിന് യോഗ്യത നേടി. എട്ട് വിദ്യാര്‍ഥികള്‍ക്ക് എല്ലാ വിഷയത്തിലും എ പ്ലസ് ലഭിച്ചു. അഴിയൂര്‍ ഗവ ഹയര്‍ സെക്കന്‍ഡറി സ്‌കൂളില്‍ പരീക്ഷയെഴുതിയ 87 പേരില്‍ 85 പേരും വിജയിച്ചു. തിരുവള്ളൂര്‍ ശാന്തിനികേതന്‍ ഹയര്‍ സെക്കന്‍ഡറി സ്‌കൂളില്‍ 249 വിദ്യാര്‍ഥികള്‍ പരീക്ഷക്കിരുന്നതില്‍ 246 പേര്‍ ഉപരിപഠനത്തിന് യോഗ്യത നേടി.