വാഷിങ്ടണ്‍: അമേരിക്കയ്‌ക്കെതിരായ വ്യാപാരയുദ്ധത്തില്‍ ചൈനയ്ക്കു കനത്ത നഷ്ടം സംഭവിച്ചതായി യു.എസ് പ്രസിഡന്റ് ഡൊണാള്‍ഡ് ട്രംപ്. ചൈനീസ് ഉന്നത വൃത്തങ്ങളുമായി കൂടിക്കാഴ്ച നടത്തിയ ശേഷം വ്യവസായ പ്രതിനിധി സംഘം അമേരിക്കയില്‍ തിരിച്ചെത്തിയതിനു പിറകെയാണ് ട്രംപിന്റെ പ്രസ്താവന പുറത്തുവന്നത്.
''ചൈനീസ് നേതാക്കളുമായും വ്യവസായ പ്രതിനിധികളുമായും സംസാരിച്ച ശേഷം ഞങ്ങളുടെ പ്രതിനിധി സംഘം തിരിച്ചെത്തിയിരിക്കുകയാണ്. വ്യാപാരയുദ്ധത്തിന്റെ ഫലങ്ങളെ കുറിച്ചു പരിശോധിക്കാന്‍ നാളെ യോഗം ചേരുന്നുണ്ട്. വ്യാപാരയുദ്ധത്തില്‍ അമേരിക്ക വിജയിച്ചതോടെ കനത്ത നഷ്ടമാണ് ചൈനയ്ക്കുണ്ടായിരിക്കുന്നത്.''-ട്രംപ് ട്വീറ്റ് ചെയ്തു. ചൈന തെറ്റായ വ്യാപാരനയങ്ങളിലൂടെ അമേരിക്കന്‍ ചരക്കുകള്‍ക്ക് അധിക ബാധ്യത വരുത്തിയിരിക്കുകയാണെന്ന് ആരോപിച്ചാണ് ട്രംപ് ഭരണകൂടം വ്യാപാരയുദ്ധത്തിനു തുടക്കമിട്ടത്. ചൈനീസ് ചരക്കുകള്‍ക്ക് വര്‍ധിച്ച തോതില്‍ തീരുവ കൂട്ടുകയായിരുന്നു യു.എസ് നടപടി. ഇതിനു തിരിച്ചടിയായി ചൈനയും നൂറുകണക്കിന് യു.എസ് ഉല്‍പന്നങ്ങള്‍ക്കു തീരുവ ഏര്‍പ്പെടുത്തി.
വ്യാപാരയുദ്ധം കൂടുതല്‍ നാശനഷ്ടങ്ങള്‍ സൃഷ്ടിക്കുന്നത് തടയുന്നതിനെ കുറിച്ചു ചര്‍ച്ച ചെയ്യാനായിരുന്നു യു.എസ് സംഘം ചൈനയിലെത്തിയത്. സന്ദര്‍ശനം രണ്ടു ദിവസം നീണ്ടുനിന്നു.