പട്ടിക്കാട്: ഫുട്‌ബോള്‍ ടൂര്‍ണമെന്റിലെ ലാഭവിഹിതം കുടിവെള്ള വിതരണത്തിലേക്ക് നല്‍കി. പട്ടിക്കാട് ഹയര്‍ സെക്കന്‍ഡറി സ്‌കൂള്‍ സ്റ്റേഡിയത്തില്‍ നടന്ന സെവന്‍സ് ഫുട്‌ബോള്‍  ടൂര്‍ണമെന്റിലെ ലാഭവിഹിതമാണ് പട്ടിക്കാട് പാസ് ക്ലബ് പ്രവര്‍ത്തകര്‍ കുടിവെള്ള വിതരണത്തിലേക്കായി  നീക്കിവച്ചത്. രൂക്ഷമായ ജലക്ഷാമം നേരിടുന്ന പ്രദേശത്തെ കുടിവെള്ള പ്രശ്‌നത്തിന് ആശ്വാസമേകുന്നതിനായി തൊട്ടടുത്തുള്ള പ്രദേശങ്ങളില്‍ നിന്ന് ടാങ്കറുകളില്‍ വെള്ളമെത്തിച്ചാണ് ക്ലബ്  പ്രവര്‍ത്തകര്‍ വീടുകളില്‍ വെള്ളം നല്‍കി വരുന്നത്.
ഇതിനായി മുഹമ്മദാലിയുടെ വീട്ടിലെ  കുഴല്‍കിണറില്‍ നിന്നുള്ള വെള്ളമാണ് ഉപയോഗിക്കുന്നത്. എന്നാല്‍ ദിവസേന വെള്ളമെത്തിക്കുന്നതിനും വാഹനത്തില്‍ ഇന്ധനം നിറക്കുന്നതിനും മറ്റും വലിയ തുകയാണ് ചെലവ് വരുന്നത്. ഇതിലേക്ക് പണം സ്വരൂപിക്കുന്നതിനു വേണ്ടിയാണ് ഒരു മാസത്തോളം നീണ്ടുനിന്ന ഫുട്‌ബോള്‍ ടൂര്‍ണമെന്റ്  സംഘടിപ്പിച്ചത്. ക്ലബ് പ്രസിഡന്റ് കെ.ടി അബ്ബാസ്, പി. ബഷീര്‍, എ. ആസിഫ്, കെ. യാസര്‍, ടി. അനസ് ബാബു എന്നിവരുടെ നേതൃത്വത്തില്‍ നിരവധി പേരാണ് കുടിവെള്ള പദ്ധതി വിജയത്തിനായി  പ്രവര്‍ത്തിച്ചുവരുന്നത്.