പേരൂര്‍ക്കട: ആഡംബരവാഹനത്തില്‍ കറങ്ങിനടന്ന് കഞ്ചാവ് വില്‍പ്പന നടത്തിയ രണ്ടുപേരെ പൊലിസ് അറസ്റ്റു ചെയ്തു. വെള്ളയമ്പലം ഒബ്‌സര്‍വേറ്ററി ഹില്‍ഡ് റോഡില്‍ താമസിക്കുന്ന മധുപന്‍ (21), വെട്ടുകാട് നെഹ്‌റു ജങ്ഷനില്‍ താമസിക്കുന്ന ക്രിസ്റ്റി (21) എന്നിവരാണ് അറസ്റ്റിലായത്. നര്‍ക്കോട്ടിക് സെല്‍ ടീമും ഷാഡോ ടീമും ചേര്‍ന്നാണ് ഇവരെ പിടികൂടിയത്.
വഴുതക്കാട് ആകാശവാണിക്കു സമീപത്തുവച്ചാണ് ഇവര്‍ സഞ്ചരിച്ച കാറില്‍നിന്ന് രണ്ടു കിലോയോളം കഞ്ചാവ് പൊലിസ് പിടിച്ചെടുത്തത്. ഫോണ്‍മുഖേനയാണ് പ്രതികള്‍ കഞ്ചാവ് വില്‍പ്പന നടത്തിവന്നിരുന്നത്. ഇതേ ആഡംബര കാറില്‍ അന്യസംസ്ഥാനങ്ങളില്‍ പോയി കഞ്ചാവ് വാങ്ങി സംശയം തോന്നാത്ത രീതിയില്‍ അതിര്‍ത്തി കടത്തിക്കൊണ്ടുവന്ന് ചെറുകവറുകളിലാക്കി അഞ്ഞൂറ്, ആയിരം, മൂവായിരം നിരക്കുകളിലാണ് ഇവര്‍ വില്‍പ്പന നടത്തുന്നത്.
ഇവരുടെ ഫോണുകള്‍ പരിശോധിച്ചതിലും പ്രതികളെ ചോദ്യം ചെയ്തതിലും നഗരത്തിലെ സമ്പന്ന കുടുംബങ്ങളിലെ വിദ്യാര്‍ഥികളാണ് ഇവരുടെ ഇരകളെന്ന് കണ്ടത്തി. ഇക്കാര്യത്തില്‍ ശക്തമായ തുടര്‍ നടപടികള്‍ സ്വീകരിക്കുമെന്ന് കമ്മിഷണര്‍ സ്പര്‍ജന്‍ കുമാര്‍ അറിയിച്ചു.
നര്‍ക്കോട്ടിക് സെല്‍ എ.സി ആര്‍. ദത്തന്‍, കണ്‍ട്രോള്‍ റൂം എ.സി പ്രമോദ്കുമാര്‍, മ്യൂസിയം എസ്.ഐ ശ്രീകാന്ത്, നര്‍ക്കോട്ടിക് ടീം അംഗങ്ങളായ ശ്രീകുമാര്‍, മോഹന്‍കുമാര്‍, സാജുകുമാര്‍, ശ്രീകുമാര്‍, ബൈജു എന്നിവരും ഷാഡോ ടീമിലെ അരുണ്‍, രഞ്ജിത്ത്, ജയകൃഷ്ണന്‍ എന്നിവരും ചേര്‍ന്നു പിടികൂടിയ പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.