മുംബൈ: ഇസ്‌ലാമിക മതപ്രഭാഷകന്‍ സാകിര്‍ നായികിന്റെ ഇസ്‌ലാമിക് റിസര്‍ച്ച് ഫൗണ്ടേഷന്റെ(ഐ.ആര്‍.ഫ്) നിരോധനം തുടരും. നിരോധനത്തെ ചോദ്യം ചെയ്തുകൊണ്ട് ഡല്‍ഹി ഹൈക്കോടതിയില്‍ ഐ.ആര്‍.എഫ് നല്‍കിയ ഹരജി കോടതി തള്ളുകയായിരുന്നു.

ഐ.ആര്‍.എഫിന്റെ ബാങ്ക് അക്കൗണ്ടുകള്‍ മരവിപ്പിച്ച നടപടി ഒഴിവാക്കണമെന്ന ആവശ്യവും ഹൈക്കോടതി അംഗീകരിച്ചില്ല. സംഘടനയെ നിരോധിക്കാനാവശ്യമയായ രേഖകള്‍ കേന്ദ്ര സര്‍ക്കാരിന്റെ കൈവശമുണ്ടെന്നും കോടതി വ്യക്തമാക്കി. ഇന്നു രാവിലെയാണ് ഹരജി പരിഗണിച്ച് ഡല്‍ഹി ഹൈക്കോടതി നിലപാട് അറിയിച്ചത്. അഞ്ചു വര്‍ഷത്തേക്കാണ് സംഘടനയെ നിരോധിച്ചത്.

വിദേശത്തു നിന്ന് അനധികൃതമായി പണം സ്വീകരിക്കുന്നുണ്ടെന്ന് കാണിച്ചാണ് സംഘടനയുടെ ബാങ്ക് അക്കൗണ്ടുകള്‍ മരവിപ്പിച്ചത്. സാകിര്‍ നായികിനെതിരേ ബംഗ്ലാദേശിലെ ഒരു പത്രം വാര്‍ത്ത നല്‍കിയതോടെയാണ് കേന്ദസര്‍ക്കാര്‍ സാകിര്‍ നായികിനെതിരേയും അദ്ദേഹത്തിന്റെ സംഘടനയേയും നിരോധിക്കാനുള്ള നീക്കം ശക്തമാക്കിയത്. എന്നാല്‍ വാര്‍ത്ത നല്‍കിയതില്‍ തെറ്റുപറ്റിയതാണെന്നു പറഞ്ഞ് പത്രം പിന്നീട് ഖേദം പ്രകടിപ്പിക്കുകയും ചെയ്തിരുന്നു.