വടക്കാഞ്ചേരി : കഴിഞ്ഞ കാലവര്‍ഷത്തില്‍ തകര്‍ന്നു വീഴുകയും അധികൃതരുടെ അവഗണനയെ തുടര്‍ന്നു കഴിഞ്ഞ ഒരു വര്‍ഷമായി അയ്യംപാറം തോട്ടില്‍ കിടക്കുകയും ചെയ്തിരുന്ന കുണ്ടുകാട് അയ്യംപാറ പാലത്തിനു ഒടുവില്‍ ശാപമോക്ഷം. വന്‍ ജനകീയ പ്രതിഷേധത്തെ തുടര്‍ന്നു പാലം പുനര്‍നിര്‍മ്മാണം ആരംഭിച്ചു.
വടക്കാഞ്ചേരി ഒല്ലൂര്‍ നിയോജക മണ്ഡലങ്ങളുടെ അതിര്‍ത്തിയില്‍ നിലകൊള്ളുന്ന പാലം തകര്‍ന്നതിനെ തുടര്‍ന്നു ആയിരകണക്കിനു കുടുംബങ്ങളുടെ സഞ്ചാരസ്വാതന്ത്ര്യം തടസപ്പെട്ട നിലയിലായിരുന്നു. നിരവധി ബസുകളുടെ സര്‍വ്വീസും സ്തംഭിച്ചു. കുണ്ടുകാട് നിന്നു കട്ടിളപൂവ്വം, പുല്ലീകണ്ടം, പഴയന്നൂപാടം എന്നിവിടങ്ങളിലേയ്ക്കുള്ള വാഹന ഗതാഗതവും തടസപ്പെട്ടു.
പാലം പുനര്‍നിര്‍മിക്കണമെന്നു ആവശ്യപ്പെട്ടു നാട്ടുകാര്‍ എം.എല്‍.എ മാരായ അനില്‍ അക്കര, അഡ്വ: കെ. രാജന്‍ എന്നിവര്‍ക്കു നിവേദനം നല്‍കിയിരുന്നുവെങ്കിലും നടപടിയുണ്ടായില്ല. ഇതിനെ തുടര്‍ന്നു നാട്ടുകാര്‍ ആക്ഷന്‍ കൗണ്‍സില്‍ രൂപീകരിച്ചു പ്രക്ഷോഭം നടത്തുകയും പൊതുമരാമത്ത് നിരത്ത് വിഭാഗം ഓഫീസിനു മുന്നില്‍ ധര്‍ണ നടത്തുകയും ചെയ്തിരുന്നു. ഇതോടെയാണു അധികൃതര്‍ ഉറക്കമുണര്‍ന്നത്.
പാലം നിര്‍മാണത്തിനു 25 ലക്ഷം രൂപയാണു അനുവദിച്ചത്. പഴയപാലം പൂര്‍ണമായും പൊളിച്ചു നീക്കിയാണു പുതിയ പാല നിര്‍മാണം. അടിത്തട്ടിലെ നിര്‍മാണ പ്രവര്‍ത്തനങ്ങള്‍ പൂര്‍ണമായും പൂര്‍ത്തിയായി കഴിഞ്ഞു. അടുത്ത കാലവര്‍ഷത്തിനു മുമ്പു പൂര്‍ണമായും പ്രവര്‍ത്തനം പൂര്‍ത്തീകരിക്കുന്നതിനാണു തീരുമാനം.