റിയാദ്: അന്താരാഷ്ട്ര വിപണികളിലെ പ്രശസ്ത കമ്പനികളുടെ പേരിലുള്ള സാധനങ്ങള്‍ വിദേശങ്ങളില്‍ നിന്നും ഇറക്കുമതി ചെയ്തു വില്‍പ്പന നടത്തിയ കേസില്‍ മലയാളിയടക്കം മൂന്നു പേര്‍ക്ക് സഊദി ക്രിമിനല്‍ കോടതി ശിക്ഷ വിധിച്ചു.

സ്ഥാപനത്തിന്റെ നടത്തിപ്പുകാരനായ മലയാളിയായ ബദറുദ്ധീന്‍ പുളിക്കത്തൊടിയക്കെതിരെയാണ് കോടതി നടപടി സ്വീകരിച്ചത്. ഇദ്ദേഹത്തെ കൂടാതെ കടയുടമകളായ രണ്ടു സഊദി പൗരന്മാരാരെയും റിയാദ് ക്രിമിനല്‍ കോടതി ശിക്ഷിച്ചതെന്നു സഊദി വാണിജ്യ, നിക്ഷേപ മന്ത്രാലയം അറിയിച്ചതായി സഊദി പ്രാദേശിക മാധ്യമം റിപ്പോര്‍ട്ട് ചെയ്തു.

സ്‌പെയര്‍ പാര്‍ട്‌സ് ഇറക്കുമതി മൊത്ത വ്യാപാര മേഖലയില്‍ പ്രവര്‍ത്തിക്കുന്ന സുഹൈര്‍ ബിന്‍ അബ്ദുല്ല മഹ്ദി ആലു റബാഹ് ട്രേഡിങ് ഏറ്റാബ്ലിഷ്‌മെന്റ് സ്ഥാപനത്തിനെതിരെയാണ് നടപടികള്‍ സ്വീകരിച്ചത്.

സ്ഥാപന ഉടമ സുഹൈര്‍ ബിന്‍ അബ്ദുള്ള മഹ്ദി ആലു റബാഹ്, പാര്‍ട്ടണര്‍ ആയ ഉടമയുടെ സഹോദരന്‍ മുഹമ്മദ്, സ്ഥാപന നടത്തിപ്പുകാരനായ ബദറുദ്ധീന്‍ പുളിക്കത്തൊടി എന്നിവര്‍ക്കാണ് ശിക്ഷ വിധിച്ചത്. ഒന്നര ലക്ഷം റിയാല്‍ പിഴയും സ്ഥാപനത്തിലെ വ്യാജ ഉല്‍പ്പന്നങ്ങള്‍ പിടിച്ചെടുക്കാനും കോടതി ഉത്തരവിട്ടു.

നിയമ ലംഘകരുടെ പേര് വിവരങ്ങളും അവര്‍ നടത്തിയ നിയമ ലംഘനങ്ങളും സ്വന്തം ചിലവില്‍ പത്രത്തില്‍ പരസ്യം ചെയ്യാനും കോടതി ഉത്തരവുണ്ട്. വാണിജ്യ, നിക്ഷേപ മന്ത്രാലയം നടത്തിയ പരിശോധനയില്‍ സ്ഥാപനത്തില്‍ നിന്നും വന്‍ ശേഖരമാണ് കണ്ടെത്തിയിരുന്നത്. പ്രാഥമികാന്വേഷണം പൂര്‍ത്തിയായ ശേഷം നടപടികള്‍ സ്വീകരിക്കുന്നതിന് ഇവര്‍ക്കെതിരെയുള്ള കേസ് പിന്നീട് പബ്ലിക് പ്രോസിക്യൂഷന് കൈമാറുമാറുകയായിരുന്നു.