കോഴിക്കോട്: സംസ്ഥാനത്ത് സ്ത്രീകള്‍ക്കെതിരായ അതിക്രമങ്ങളും ബാലികാപീഡനങ്ങളും വര്‍ധിച്ചുവരുന്നതും പൊലിസിന്റെ വീഴ്ചയും സംബന്ധിച്ചും ജുഡീഷ്യല്‍ അന്വേഷണം നടത്തുകയും ധവളപത്രം പുറത്തിറക്കുകയും വേണമെന്ന് സി.എം.പി.സംസ്ഥാന ജനറല്‍ സെക്രട്ടറി സി.പി.ജോണ്‍. കോഴിക്കോട്ട് എം.വി.ആര്‍.ഫൗണ്ടേഷന്റെ അക്കാദമിക് വിഭാഗം ഉദ്ഘാടനം ചെയ്തശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
അതിക്രമങ്ങള്‍ റിപ്പോര്‍ട്ട് ചെയ്യുന്നവരെ പിന്തിരിപ്പിക്കുകയോ പീഡിപ്പിക്കുകയോ ചെയ്ത് പ്രതികളെ സംരക്ഷിക്കുന്ന നിലപാടാണ് പൊലിസ് സ്വീകരിക്കുന്നത്. സംഭവങ്ങളില്‍ പൊലിസിന് മാത്രമാണ് വീഴ്ച പറ്റുന്നതെന്ന മുഖ്യമന്ത്രിയുടെ വാദവും യുക്തിസഹമല്ല. ഇത് സംബന്ധിച്ച വസ്തുത പുറത്തുകൊണ്ടുവരാന്‍ ഹൈക്കോടതിയിലെ സിറ്റിങ് ജഡ്ജിയെക്കൊണ്ട് അന്വേഷണം നടത്തേണ്ടതുണ്ട്. അതിക്രമങ്ങള്‍ക്കെതിരെ നടപടിയെടുക്കുന്നതില്‍ എവിടെയാണ് പിഴച്ചതെന്നതിനെക്കുറിച്ച് ധവളപത്രം അടിയന്തരമായി പുറത്തിറക്കണമെന്നും അദ്ദേഹം കൂട്ടിച്ചേര്‍ത്തു.