കോഴിക്കോട്: നടക്കാവിലെ കെ.എസ്.ആര്‍.ടി.സിയുടെ റീജ്യനല്‍ വര്‍ക്‌ഷോപ്പില്‍ നിര്‍മിച്ച പഴയ മോഡല്‍ ബസുകള്‍ രജിസ്റ്റര്‍ ചെയ്യാന്‍ കേന്ദ്ര മോട്ടോര്‍ വാഹന വകുപ്പിന്റെ പ്രത്യേക ഉത്തരവ്. മലിനീകരണമുണ്ടാക്കുന്ന ബി.എസ് ത്രീ എന്‍ജിനുള്ള ബസുകള്‍ക്ക് നിലവില്‍ മോട്ടോര്‍ വാഹന വകുപ്പ് അനുമതി നല്‍കുന്നില്ല. കേന്ദ്ര സര്‍ക്കാരിന്റെ നിര്‍ദേശാനുസരണം മലനീകരണ നിയന്ത്രണമുള്ള ബി.എസ് ഫോര്‍ വാഹനങ്ങള്‍ക്കു മാത്രമേ നിലവില്‍ പെര്‍മിറ്റ് ലഭിക്കുകയുള്ളു. ഈ വിഭാഗത്തില്‍ പെടാത്ത പഴയ മോഡല്‍ ബസുകള്‍ രജിസ്റ്റര്‍ ചെയ്യാനാവില്ലെന്ന് സംസ്ഥാന മോട്ടോര്‍ വാഹന വകുപ്പ് നേരത്തെ കെ.എസ്.ആര്‍.ടി.സിയെ അറിയിച്ചിരുന്നു.
ഇതുകാരണം നിര്‍മാണം പൂര്‍ത്തിയായ 25 ബസുകള്‍ രജിസ്റ്റര്‍ ചെയ്യാന്‍ കഴിയാതെ നടക്കാവിലെ വര്‍ക്‌ഷോപ്പില്‍ പൊടിപിടിച്ചു കിടക്കുകയായിരുന്നു. അഞ്ചുകോടി രൂപ നിര്‍മാണ ചെലവു വരുന്ന ബസുകള്‍ക്ക് റോഡിലിറങ്ങാനാകാത്ത സ്ഥിതിയുമുണ്ടായി. ഇതിനു പരിഹാരമായി നിലവില്‍ കോഴിക്കോട് റിജ്യനല്‍ വര്‍ക്‌ഷോപ്പിലെയും തിരുവനന്തപുരം സെന്ററിലെയും എടപ്പാള്‍, ആലുവ, മാവേലിക്കര എന്നീ വര്‍ക്‌ഷോപ്പിലെയും മുഴുവന്‍ പഴയ മോഡല്‍ ബസുകള്‍ക്കും നാളെ മുതല്‍ കേരള മോട്ടോര്‍ വാഹന വകുപ്പ് രജിസ്‌ട്രേഷന്‍ നല്‍കും.
നിര്‍മാണം പൂര്‍ത്തിയായ ഏതാനും ബസുകള്‍ കഴിഞ്ഞ മാസം ആര്‍.ടി.ഒ ഓഫിസില്‍ പെര്‍മിറ്റിനായി എത്തിയപ്പോഴാണ് അനുമതി ലഭിക്കില്ലെന്ന വിവരം കെ.എസ്.ആര്‍.ടി.സി അധികൃതര്‍ അറിയുന്നത്. ഡിസംബര്‍ 31ന് ശേഷം ബി.എസ് ത്രീ ബസുകള്‍ക്ക് അനുമതി നല്‍കാനാവില്ലെന്നായിരുന്നു മോട്ടോര്‍ വാഹന വകുപ്പിന്റെ നിലപാട്. ജനുവരി മുതല്‍ ബി.എസ് ഫോര്‍ എന്‍ജിനുള്ള വാഹനങ്ങള്‍ക്കു മാത്രമേ അനുമതി നല്‍കുകയുള്ളുവെന്ന് അവര്‍ അറിയിച്ചു. കെ.എസ്.ആര്‍.ടി.സി നിര്‍മിച്ച 25 ബസുകളും സാങ്കേതികമായി ബി.എസ് ഫോര്‍ കാറ്റഗറിയിലേക്കു മാറ്റാന്‍ കഴിയുന്നവയായിരുന്നില്ല. പുതിയ നിയന്ത്രണം കേന്ദ്ര സര്‍ക്കാരിന്റേതായതിനാല്‍ സംസ്ഥാന സര്‍ക്കാരിന് പ്രത്യേക ഉത്തരവിറക്കി അനുമതി നല്‍കാനും കഴിഞ്ഞിരുന്നില്ല.
തുടര്‍ന്ന് കേന്ദ്ര സര്‍ക്കാരില്‍ നിന്ന് പ്രത്യേക അനുമതി ലഭിച്ചതോടെയാണ് ഈ ബസുകള്‍ റോഡിലിറക്കാനുള്ള അവകാശം ലഭിച്ചത്. ബസുകള്‍ റോഡിലിറക്കാന്‍ കഴിയാത്തതിനാല്‍ ദിവസവും ഇവയില്‍ നിന്നു ലഭിക്കേണ്ട വരുമാനം കെ.എസ്.ആര്‍.ടി.സിക്ക് നഷ്ടമായിരുന്നു. നിലവില്‍ ശമ്പളമുള്‍പ്പെടെയുള്ള ചെലവുകള്‍ക്ക് തന്നെ പ്രയാസപ്പെടുമ്പോള്‍ കോടികള്‍ മുടക്കി നിര്‍മിച്ച ബസുകള്‍ ഷെഡില്‍ കിടക്കുന്നത് കോര്‍പറേഷന് വലിയ തിരിച്ചടിയാണുണ്ടാക്കിയിരുന്നത്.