തിരുവനന്തപുരം: ജലസംരക്ഷണ പദ്ധതിയായ ജലസ്വരാജിന്റെ ഭാഗമായി 10 ലക്ഷം വൃക്ഷത്തൈകള്‍ തയാറാക്കുന്നതിന്റെ ഉദ്ഘാടനം തിരുവനന്തപുരത്ത് നടന്നു. ബി.ജെ.പി സംസ്ഥാന അദ്ധ്യക്ഷന്‍ കുമ്മനം രാജശേഖരന്‍ പരിപാടി ഉദ്ഘാടനം ചെയ്തു. ജലം കേന്ദ്രീകരിച്ചുള്ള ആസൂത്രണമാണ് ഭാവി കേരളത്തിന് വേണ്ടതെന്ന് കുമ്മനം രാജശേഖരന്‍ അഭിപ്രായപ്പെട്ടു. സംസ്ഥാനത്തിന്റെ ബജറ്റ് പോലും ജലകേന്ദ്രീകൃതമാകേണ്ടത് കാലഘട്ടത്തിന്റെ ആവശ്യമാണ്. അതിലൂടെ മാത്രമേ കേരളം രക്ഷപ്പെടുകയുള്ളൂ. ജലസംരക്ഷണം എന്ന ദൗത്യമാണ് ജലസ്വരാജിലൂടെ ബി.ജെ.പി ഏറ്റെടുക്കുന്നത്. അടുത്ത പരിസ്ഥിതി ദിനത്തില്‍ ഇത് കേരളം മുഴുവന്‍ നടുമെന്നും കുമ്മനം പറഞ്ഞു.
ചടങ്ങില്‍ പങ്കെടുത്തവര്‍ ഫലവൃക്ഷങ്ങളുടെ വിത്ത് നട്ടാണ് പരിപാടി ഉദ്ഘാടനം ചെയ്തത്. ഹരിത കേരളം എന്ന മഹത്വം ഇനി അധിക കാലം കൊട്ടിഘോഷിക്കാന്‍ ആവുമോയെന്ന് കേരളം ചിന്തിക്കേണ്ട കാലം അതിക്രമിച്ചെന്ന് മുഖ്യ പ്രഭാഷണം നടത്തിയ ഒ രാജഗോപാല്‍ എം.എല്‍.എ പറഞ്ഞു. മരം പോയാലും മനുഷ്യന്‍ മതി എന്ന ചിന്ത ശുദ്ധ വിവരക്കേടാണെന്ന് പ്രശസ്ത ശില്‍പ്പി കാനായി കുഞ്ഞിരാമന്‍ പറഞ്ഞു. 10 ലക്ഷം ഫലവൃക്ഷങ്ങള്‍ രണ്ടു മാസം കൊണ്ട് വളര്‍ത്തിയെടുക്കും. ഈ തൈകള്‍ സംസ്ഥാന വ്യാപകമായി വിതരണം ചെയ്ത് വെച്ചു പിടിപ്പിക്കാനാണ് പാര്‍ട്ടി ലക്ഷ്യമിടുന്നത്.ഡോ സുഭാഷ് ചന്ദ്രബോസ് ജലസംരക്ഷണ പ്രതിജ്ഞ ചൊല്ലിക്കൊടുത്തു. ജില്ലാ അധ്യക്ഷന്‍ അഡ്വ എസ് സുരേഷ്, ജലസ്വരാജ് കോര്‍ഡിനേറ്റര്‍ പ്രൊഫ രഘുനാഥ് തുടങ്ങിയവര്‍ പങ്കെടുത്തു.