നെടുമങ്ങാട്: അരുവിക്കര പഞ്ചായത്തിലെ ഇരുമ്പ കാച്ചാണി റോഡിന്റെ നിര്‍മാണോദ്ഘാടനത്തിന് സ്ഥാപിച്ച ശിലാഫലകം സാമൂഹിക വിരുദ്ധര്‍ നശിപ്പിച്ചു. മന്ത്രി ജി.സുധാകരന്‍ നിര്‍മാണോദ്ഘാടനം നിര്‍വ്വഹിച്ച റോഡിന്റെ ശിലാഫലകമാണ് കഴിഞ്ഞ ദിവസം രാത്രി നശിപ്പിച്ചത്. മന്ത്രിയുടെയും ശബരീനാഥന്‍ എം.എല്‍.എയുടെയും ചിത്രങ്ങള്‍ ഉള്‍പ്പെടുത്തി സ്ഥാപിച്ചിരുന്ന ഫ്‌ളക്‌സ് ബോര്‍ഡുകളും നശിപ്പിച്ചിട്ടുണ്ട്.
റോഡിന്റെ നിര്‍മാണോദ്ഘാടനവുമായി ബന്ധപ്പെട്ടു ജനപ്രതിനിധികളുടെ കൂട്ട ബഹിഷ്‌ക്കരണം വരെ നടന്നിരുന്നു. ഇടത് പക്ഷത്തെ പ്രമുഖനായ മന്ത്രി ചടങ്ങിനെത്തിയിട്ടും പ്രാദേശിക ഇടത് പ്രതിനിധികള്‍ ആരും തന്നെ വരാത്തത് വലിയ പ്രതിഷേധത്തിനിടയാക്കിയിരുന്നു. ഉദ്ഘാടന പ്രസംഗത്തില്‍ പരിപാടി ബഹിഷ്‌ക്കരിച്ച ഇടത് പ്രതിനിധികള്‍ക്കെതിരെ മന്ത്രിയും വിമര്‍ശനം ഉന്നയിച്ചിരുന്നു. അതിന് പിന്നാലെയാണ് ശിലാഫലകം അടിച്ചു തകര്‍ത്തത്.