രണ്ടാംവര്‍ഷ നിയമ വിദ്യാര്‍ഥി ഷഹീര്‍ ഷൗക്കത്തലിയെ പാമ്പാടി നെഹ്‌റു കോളജിലെ ഇടിമുറിയില്‍ ക്രൂരമായി മര്‍ദിച്ചു എന്നതായിരുന്നു കേസ്.
കൃഷ്ണദാസിനൊപ്പം ലക്കിടി കോളജിലെ ലീഗല്‍ അഡൈ്വസര്‍ സുചിത്ര, പാമ്പാടി കോളജിലെ അഡ്മിനിസ്‌ട്രേറ്റീവ് മാനേജര്‍ സുകുമാരന്‍, കായികാധ്യാപകന്‍ ഗോവിന്ദന്‍കുട്ടി, പി.ആര്‍.ഒ വത്സലകുമാര്‍ എന്നിവരെയും ക്രൈബ്രാഞ്ച് അറസ്റ്റു ചെയ്തിരുന്നു.

ജനുവരി മൂന്നിനാണ് ഷഹീറിനെ ലക്കിടി കോളജില്‍ നിന്ന് പാമ്പാടി നെഹ്‌റു കോളജിലേക്കു വാഹനത്തില്‍ കയറ്റിക്കൊണ്ടു വന്ന് കോളജിലെ ഇടിമുറിയില്‍ വച്ച് അതിക്രൂരമായി മര്‍ദിച്ചത്. നിയമവിരുദ്ധമായ പണംപിരിക്കല്‍, വിദ്യാര്‍ഥികള്‍ക്കു നേരെയുള്ള പീഡനം തുടങ്ങിയവക്കെതിരേ മുന്‍ മുഖ്യമന്ത്രിയുടെ സുതാര്യകേരളം പരിപാടിയില്‍ ഷഹീര്‍ പരാതിനല്‍കിയിരുന്നു. ഇതില്‍ കാലിക്കറ്റ് യൂണിവേഴ്‌സിറ്റി അധികൃതര്‍ അന്വേഷണം നടത്തുകയും ചെയ്തു. ഇതിന്റെ പ്രതികാരമായാണ് ഷഹീറിനെ തല്ലിച്ചതച്ചത്.

കോളജില്‍ അഞ്ചുപേരെ റാഗ് ചെയ്തുവെന്ന് ബലമായി എഴുതിവാങ്ങിയാണ് കൃഷ്ണദാസിന്റെ ഓഫിസിലും ഇടിമുറിയിലും വച്ച് പ്രതികള്‍ മര്‍ദിച്ചത്. മാനസികമായി തകര്‍ന്ന ഷഹീര്‍ ആത്മഹത്യ ചെയ്യാന്‍ തീരുമാനിക്കുകയും സുഹൃത്തുക്കള്‍ക്ക് വാട്‌സ് ആപ് സന്ദേശം അയക്കുകയും ചെയ്തു. തുടര്‍ന്ന് സുഹൃത്തുക്കളുടേയും രക്ഷിതാക്കളുടേയും നിര്‍ദേശപ്രകാരം ഫെബ്രുവരി 27നു മുഖ്യമന്ത്രിക്ക് പരാതി നല്‍കുകയായിരുന്നു. പഴയന്നൂര്‍ പൊലിസ് രജിസ്റ്റര്‍ ചെയ്ത കേസ് പിന്നീട് ജില്ലാ ക്രൈംബ്രാഞ്ചിന് കൈമാറുകയായിരുന്നു.