തളിപ്പറമ്പ്: ഓരോ തുള്ളി ജലവും അമൂല്യമാണെന്നും അത് പാഴാക്കരുതെന്നുമുള്ള സന്ദേശമുയര്‍ത്തി ലോകമെങ്ങും ജലദിനമാചരിക്കുമ്പോള്‍ ഒരു നഗരത്തിനു മുഴുവന്‍ വര്‍ഷങ്ങളായി ശുദ്ധജലം നല്‍കിയിരുന്ന വാട്ടര്‍ അതോറിറ്റിയുടെ കിണറും പമ്പ് ഹൗസും അനുബന്ധ ഉപകരണങ്ങളും ഉപേക്ഷിക്കപ്പെട്ട നിലയില്‍. തളിപ്പറമ്പ് നഗരത്തിനു മുപ്പതു വര്‍ഷത്തോളം കുടിവെള്‌ലം നല്‍കിയ കരിമ്പം പുഴയിലെ വാട്ടര്‍ അതോറിറ്റിയുടെ കിണറും പരിസരവുമാണ് സാമൂഹ്യ വിരുദ്ധരുടെ താവളമായി നശിക്കുന്നത്.
പമ്പ് ഹൗസിന്റെ വാതിലുകള്‍ പൊളിച്ചിട്ട നിലയിലാണ്. രണ്ട് മോട്ടോറുകളും അനുബന്ധമായ വിലപിടിപ്പുള്ള ഉപകരണങ്ങള്‍ക്കും യാതൊരു സംരക്ഷണവുമില്ല. പലതും മോഷണം പോയി. മദ്യക്കുപ്പികള്‍ കൊണ്ട് നിറഞ്ഞിരിക്കുകയാണ് ഇവിടം.
1987ലാണ് വാട്ടര്‍ അതോറിറ്റിയുടെ കീഴില്‍ കരിമ്പം പുഴയില്‍ കിണറും പമ്പ് ഹൗസും ചെക്ക് ഡാമും വിതരണ ശൃംഘലയും സ്ഥാപിച്ചത്. പിന്നീട് മുപ്പതു വര്‍ഷത്തോളം തളിപ്പറമ്പ് നഗരത്തിന് നിര്‍ലോഭം കുടിവെള്ളം നല്‍കിയ പദ്ധതി ജപ്പാന്‍ കുടിവെളള പദ്ധതി വന്നതോടെ ആര്‍ക്കും വേണ്ടാതായി.
വാട്ടര്‍ അതോറിറ്റി ഉപേക്ഷിച്ചെങ്കിലും നാട്ടുകാരായ ചെറുപ്പക്കാര്‍ മുന്‍കൈയെടുത്ത് ചെക്ക് ഡാമിന്റെ ഷട്ടറുകളിടുന്നതിനാല്‍ പുഴയില്‍ ആവശ്യത്തിന് വെള്ളമുണ്ട്. നാട്ടിലെങ്ങും കുടിവെള്‌ല ക്ഷാമം രൂക്ഷമാകുമ്പോള്‍ കിണറും പമ്പ് ഹൗസും പഞ്ചായത്ത് ഏറ്റെടുത്ത്  കുടിവെള്ള വിതരണ പോയിന്റാക്കി മാറ്റണമെന്നാണ് നാട്ടുകാര്‍ ആവശ്യപ്പെടുന്നത്.