തിരൂരങ്ങാടി: തിരൂരങ്ങാടി മേഖലയില്‍ നിപാ വൈറസ് മൂലം പനി ബാധിച്ചു മരിച്ചവരുടെ വീടുകള്‍ കേന്ദ്ര ആരോഗ്യ സംഘം സന്ദര്‍ശിച്ചു. തെന്നലയില്‍ ഷിജിതയുടെ വീടും മൂന്നിയൂരില്‍ സിന്ധുവിന്റെ വീടുമാണ് ഇന്നലെ വൈകിട്ട് സംഘം സന്ദര്‍ശിച്ചത്.
ഷിജിതയുടെ വീട്ടില്‍ കിണര്‍, വീടിന്റെ പരിസരം തുടങ്ങിയവ പരിശോധനയ്ക്കു വിധേയമാക്കി. സിന്ധുവിന്റെ വീട്ടിലെത്തിയ സംഘം ബന്ധുക്കളോടു കാര്യങ്ങള്‍ ചോദിച്ചറിഞ്ഞു. എന്‍.ഡി.ഡി.സി ഡിപ്പാര്‍ട്ട്‌മെന്റ് തലവന്‍ ഡോ. സുജിത് സിങ്ങിന്റെ നേതൃത്വത്തില്‍ അഡൈ്വസര്‍ ഡോ. എം.കെ ഷൗക്കത്തലി, ഡെമിയോളജി തലവന്‍ ഡോ. എസ്.കെ ജയിംസ്, എന്‍.ഡി.ഡി.സി തിരുവനന്തപുരം മേഖലാ ഡയരക്ടര്‍ ഡോ. റിച്ചു, മണിപ്പാല്‍ വൈറോളജി ഇന്‍സ്റ്റിറ്റ്യൂട്ട് ഡയരക്ടര്‍ ജി. അരുണ്‍കുമാര്‍, മലപ്പുറം ഡി.എം.ഒയെ പ്രതിനിധീകരിച്ചു ഡോ. വേലായു ധന്‍ എന്നിവരാണ് സ്ഥലം സന്ദര്‍ശിച്ചത്.
തെന്നല പി.എച്ച്.സി മെഡിക്കല്‍ ഓഫിസര്‍ ഡോ. ദിവ്യ, എച്ച്.ഐ കുട്ടിഹസന്‍, ജെ.എച്ച്.ഐ അനീഷ്‌കുമാര്‍, ജെ.പി.എച്ച്.എന്‍ ബിനു, പഞ്ചായത്ത് അംഗം സൈതാലി എന്നിവരും കൂടെയുണ്ടായിരുന്നു. അതേസമയം, ഷിജിതയുടെ ഭര്‍ത്താവ് ഉബീഷിനെയും ഇന്നലെ പനി മൂലം കോഴിക്കോട് മെഡിക്കല്‍ കോളജില്‍ പ്രവേശിപ്പിച്ചിട്ടുണ്ട്.