ചെങ്ങന്നൂര്‍: അഭ്യസ്തവിദ്യരായ ചെറുപ്പക്കാര്‍ക്ക് തൊഴില്‍ ഉറപ്പുവരുത്താനും വിനോദസഞ്ചാരം, കൃഷി, വ്യവസായം എന്നിവയ്ക്ക് ഊന്നല്‍ നല്‍കി ഉല്‍പാദനമേഖലയെ ശക്തിപ്പെടുത്താനും ലക്ഷ്യമിടുന്ന എല്‍.ഡി.എഫ് പ്രകടനപത്രിക മന്ത്രി ഡോ. ടി എം തോമസ് ഐസക് പുറത്തിറക്കി. ഏയ്‌സ് അക്കാദമി ചെയര്‍മാന്‍ കെ. രാധാകൃഷ്ണന്‍ നായര്‍ ഏറ്റുവാങ്ങി.
കെ .കെ രാമചന്ദ്രന്‍ നായര്‍ തുടങ്ങിവച്ച 750 കോടി രൂപയുടെ വിവിധ വികസനപദ്ധതികള്‍ സമയബന്ധിതമായി പൂര്‍ത്തിയാക്കാനും ഒപ്പം എല്‍.ഡി.എഫ് സര്‍ക്കാരിന്റെ വികസനപദ്ധതികള്‍ കൂടുതല്‍ പ്രയോജനപ്പെടുത്തി ചെങ്ങന്നൂരിനെ മുന്നോട്ടുനയിക്കാനും പ്രാപ്തമായതാണ് പ്രകടനപത്രിക.
ടൂറിസം, കൃഷി, വ്യവസായം എന്നിവയില്‍ ഊന്നി ഉല്‍പാദനമേഖലയില്‍ വളര്‍ച്ച ഉറപ്പാക്കാന്‍ ലക്ഷ്യമിടുന്നതാണ് പ്രകടനപത്രികയിലെ പദ്ധതികളെന്ന് മന്ത്രി ഡോ. ടി .എം തോമസ് ഐസക് പറഞ്ഞു.
കുറഞ്ഞത് 1000 കോടി രൂപയെങ്കിലും മണ്ഡലത്തില്‍ ചെലവഴിക്കാന്‍ ലക്ഷ്യമിടുന്ന പരിപാടികളാണ് പത്രികയില്‍ വിഭാവനംചെയ്തിരിക്കുന്നതെന്നും മന്ത്രി പറഞ്ഞു.
ജലടൂറിസത്തിന് പ്രാധാന്യം നല്‍കി മാന്നാര്‍ പൈതൃകഗ്രാമവും ആറന്‍മുള പൈതൃകഗ്രാമം, വരട്ടാര്‍ ജൈവവൈവിധ്യ ഉദ്യാനം എന്നിവയെ ബന്ധിപ്പിക്കുന്ന ടൂറിസം സര്‍ക്യൂട്ട്, പുരയിടകൃഷിയെയും അപ്പര്‍ കുട്ടനാട് മേഖലയെയും ബന്ധിപ്പിക്കുന്ന ഫാം ടൂറിസം, പഞ്ചപാണ്ഡവ ക്ഷേത്രങ്ങളെയും മറ്റ് ആരാധനാലയങ്ങളെയും ഉള്‍പ്പെടുത്തി തീര്‍ഥാടന ടൂറിസം എന്നിങ്ങനെ വൈവിധ്യമാര്‍ന്ന പദ്ധതികള്‍ പത്രികയില്‍ വാഗ്ദാനംചെയ്യുന്നു.
ഒപ്പം മാലിന്യസംസ്‌കരണത്തിന് പ്രത്യേക പദ്ധതി, സമ്പൂര്‍ണ വിശപ്പ് രഹിതമണ്ഡലം, തൊഴില്‍ ലഭ്യത ഉറപ്പാക്കാന്‍ വ്യവസായ, ഐടി, കാര്‍ഷിക പാര്‍ക്കുകള്‍ എന്നിവയും ലക്ഷ്യമിടുന്നു.
കെ .കെ .ആര്‍ തുടങ്ങിവച്ച പദ്ധതികള്‍ സമയബന്ധിതമായി പൂര്‍ത്തിയാക്കുന്നതിനൊപ്പം നവീന ആശയങ്ങള്‍ ഉള്‍ക്കൊള്ളുന്ന പുതിയ പദ്ധതികളും മൂന്നുവര്‍ഷത്തിനുള്ളില്‍ യാഥാര്‍ഥ്യമാക്കുമെന്ന്ചടങ്ങില്‍ സംസാരിച്ച സ്ഥാനാര്‍ഥി സജി ചെറിയാന്‍ പറഞ്ഞു.
കെ .കെ രാമചന്ദ്രന്‍ നായര്‍ മത്സരിച്ചപ്പോള്‍ പുറത്തിറക്കിയ പ്രകടനപത്രികയിലുള്‍പ്പെട്ട മുഴുവന്‍ പദ്ധതികള്‍ക്കും തുടക്കം കുറിക്കാന്‍ കഴിഞ്ഞു. ഇവയില്‍ പലതും പൂര്‍ത്തീകരിച്ചു.
കുടിവെള്ളക്ഷാമം പരിഹരിക്കാന്‍ ഒരുമീറ്റര്‍ പൈപ്പിടുകയോ പത്തുപേര്‍ക്ക് ജോലി കൊടുക്കാന്‍ കഴിയുന്ന സ്ഥാപനം കൊണ്ടുവരികയോ ചെയ്യാത്തവരാണ് വികസനത്തിന്റെ അവകാശവാദവുമായി വരുന്നതെന്നും സജി ചെറിയാന്‍ വ്യക്തമാക്കി.
പി .എം തോമസ് അധ്യക്ഷനായി. മുന്‍ എം.എല്‍.എമാരായ മാമ്മന്‍ ഐപ്പ്, ശോഭന ജോര്‍ജ് എന്നിവര്‍ സംസാരിച്ചു. എല്‍ഡിഎഫ് തെരഞ്ഞെടുപ്പു കമ്മിറ്റി സെക്രട്ടറി പി വിശ്വംഭരപ്പണിക്കര്‍ സ്വാഗതം പറഞ്ഞു.