വടകര: മണല്‍ വിതരണം തദ്ദേശ സ്വയംഭരണ സ്ഥാപനങ്ങള്‍ നേരിട്ട് ഏറ്റെടുക്കുന്ന പശ്ചാത്തലത്തില്‍ വടകര നഗരസഭാ പരിപരിധിയിലുള്ള കടവുകളില്‍ മണല്‍ വാരുന്നതിന് ഇതുവരെ ജോലി ചെയ്തവരെ മാത്രം പരിഗണിക്കാന്‍ കൗണ്‍സില്‍ യോഗത്തില്‍ തീരുമാനം.
 പ്രതിപക്ഷത്തിന്റെ എതിര്‍പ്പ് മറികടന്നു കൊണ്ടാണ് യോഗത്തില്‍ തീരുമാനമുണ്ടായത്. ഇതുപ്രകാരം ഇതുവരെ മണല്‍ വിതരണത്തിന് നേതൃത്വം നല്‍കിയ വടകര പോര്‍ട്ട് മാന്വല്‍ ഡ്രഡ്ജിങ് സൊസൈറ്റിയിലെ തൊഴിലാളികളെ തന്നെ വീണ്ടും തൊഴിലാളികളായി അഗീകരിക്കും. ഒഴിവു വരുന്ന മുറക്ക് ഈ മേഖലയില്‍ മുന്‍പ് പ്രവര്‍ത്തിച്ചവരെ പരിഗണിക്കാനും കൗണ്‍സില്‍ യോഗത്തില്‍ തീരുമാനിച്ചു.
അഴിത്തല കേന്ദ്രമായുള്ള അഴിത്തല അഴിമുഖം മാന്വല്‍ ഡ്രഡ്ജിങ് കോപറേറ്റിവ് സൊസൈറ്റിയിലെ തൊഴിലാളികള്‍ക്കു കൂടി ജോലി നല്‍കണമെന്ന് മുസ്‌ലിം ലീഗ് കൗണ്‍സിലര്‍മാര്‍ ആവശ്യം ഉന്നയിച്ചെങ്കിലും ഇവരെ ജോലി ഒഴിവുവരുന്ന മുറക്ക് പിന്നീട് പരിഗണിക്കുമെന്ന് കൗണ്‍സില്‍ തീരുമാനമെടുക്കുകയായിരുന്നു.
എന്‍.പി.എം നഫ്‌സല്‍, പി. സഫിയ, പി.എം മുസ്തഫ മാസ്റ്റര്‍ എന്നിവര്‍ ഈ മേഖലയില്‍ നേരത്തെ ജോലി ചെയ്തവരെയും പരിഗണിക്കണമെന്ന് ആവശ്യപ്പെട്ടു.
നിലവില്‍ ജോലി ചെയ്യുന്നവര്‍ ആരൊക്കെയെന്ന് പോര്‍ട്ട് കണ്‍സര്‍വേറ്റര്‍ പട്ടിക നല്‍കിയിട്ടുണ്ടെന്നും അതുപ്രകാരം തീരുമാനമെടുക്കുക എന്നതാണ് ശരിയായ രീതിയെന്നും മുനിസിപ്പല്‍ ചെയര്‍മാന്‍ അഭിപ്രായപ്പെടുകയായിരുന്നു. തുടര്‍ന്ന് പോര്‍ട്ട് ഓഫിസര്‍ നല്‍കിയ പട്ടിക അനുസരിച്ച് തീരുമാനമെടുക്കാന്‍ കൗണ്‍സില്‍ തീരുമാനിച്ചു.