ആലപ്പുഴ: കേരളത്തില്‍ വര്‍ഗീയ ധ്രുവീകരണത്തിനുള്ള ശ്രമമാണ് മദ്‌റസാഅധ്യാപന്റെ കൊലപാതകത്തിലൂടെ ലക്ഷ്യമാക്കിയിരിക്കുന്നതെന്ന് സമസ്ത കേരള ജംഇയ്യത്തുല്‍ ഉലമ ജില്ലാ കമ്മിറ്റി അഭിപ്രായപ്പെട്ടു.
തീര്‍ത്തും സമാധാന അന്തരീക്ഷത്തിലാണ് കേരളത്തിലെ ജനങ്ങള്‍ ജീവിക്കുന്നത്. പരസ്പര സഹകരണവും ഐക്യവും മതങ്ങള്‍ തമ്മില്‍ പുലര്‍ത്തുകയും മതേതരത്വ സംരക്ഷണത്തിന് വേണ്ടി ഉറച്ച് നില്‍ക്കുകയും ചെയ്യുന്നു.
ഉയര്‍ന്ന സാക്ഷരതയും തനതായ സംസ്‌കാരവുമാണ് കേരളത്തെ ഇതര സംസ്ഥാനങ്ങളില്‍ നിന്ന് വ്യത്യസ്തമാക്കുന്നത്.
രാജ്യത്തിന്റെ പല ഭാഗത്തും വര്‍ഗീയ സംഘര്‍ഷങ്ങളും കലാപങ്ങളും പൊട്ടിപ്പുറപ്പെടുമ്പോഴും കേരളത്തില്‍ അത് സാധ്യമാകാതെ വരുന്നത് മലയാളികളുടെ വിവേകപൂര്‍ണമായ ഇടപെടലാണെന്നും നേതാക്കള്‍ പറഞ്ഞു.
സമസ്ത ജില്ലാ പ്രസിഡന്റ് സി.മുഹമ്മദ് അല്‍ഖാസിമി, സെക്രട്ടറി അബ്ദുര്‍റഹ്മാന്‍ അല്‍ ഖാസിമി, മുഹമ്മദ് ഹനീഫാ ബാഖവി, ഉസ്മാന്‍ സഖാഫി, ഉസ്മാന്‍ മുസ്‌ലിയാര്‍ എന്നിവര്‍ സംസാരിച്ചു.
മതാധ്യാപകനും മുഅദ്ധിനുമായ റിയാസ് മുസ്ലിയാരുടെ കൊലപാധകം ഹീനവും അപലപനീയവുമാണെന്ന് ജംഇയ്യത്തുല്‍ മുഅല്ലിമീന്‍ ജില്ലാ പ്രസിഡന്റ് പി.എ ശിഹാബുദ്ദീന്‍ മുസ്‌ലിയാര്‍, ജനറല്‍ സെക്രട്ടറി റ്റി.എച്ച് ജഅഫര്‍ മൗലവി എന്നിവര്‍ അഭിപ്രായപ്പെട്ടു.
ഇത്തരം നീച സംഭവങ്ങള്‍ ആവര്‍ത്തിക്കുന്നത് തടയാന്‍ അധികാരികള്‍ ശ്രദ്ധിക്കണമെന്നും നേതാക്കള്‍ പറഞ്ഞു.