ലിസ്ബന്‍: ലോകകപ്പ് യോഗ്യതക്കായുള്ള യൂറോപ്യന്‍ മേഖലാ പോരാട്ടത്തില്‍ യൂറോ ചാംപ്യന്‍മാരായ പോര്‍ച്ചുഗല്‍ മുന്‍ ലോക ചാംപ്യന്‍മാരായ ഫ്രാന്‍സ് ടീമുകള്‍ക്ക് വിജയം. പോര്‍ച്ചുഗല്‍ 3-0ത്തിനു ഹംഗറിയേയും ഫ്രാന്‍സ് 3-1നു ലക്‌സംബര്‍ഗിനേയും വീഴ്ത്തി. അതേസമയം കരുത്തരായ ഹോളണ്ടിനെ ബള്‍ഗേറിയ അട്ടിമറിച്ചു. ബെല്‍ജിയം ഗ്രീസുമായുള്ള പോരാട്ടത്തില്‍ 1-1ന്റെ സമനില വഴങ്ങി. ്മറ്റു മത്സരങ്ങളില്‍ സ്വീഡന്‍ 4-0ത്തിനു ബെലാറസിനേയും സ്വിറ്റ്‌സര്‍ലന്‍ഡ് 1-0ത്തിനു ലാത്വിയയേയും ബോസ്‌നിയ ഹെര്‍സഗോവിന 5-0ത്തിനു ജിബ്രാള്‍ട്ടറിനേയും പരാജയപ്പെടുത്തി. അന്‍ഡോറ- ഫറോവ ഐലന്‍ഡ്, സൈപ്രസ്- എസ്റ്റോണിയ പോരാട്ടങ്ങള്‍ ഗോള്‍രഹിത സമനില.
ഇരട്ട ഗോളുകളുമായി നായകന്‍ ക്രിസ്റ്റ്യാനോ റൊണാള്‍ഡോ മുന്നില്‍ നിന്നു നയിച്ച പോരാട്ടത്തിലാണു ഹംഗറിക്കെതിരേ പോര്‍ച്ചുഗല്‍ വിജയം സ്വന്തമാക്കിയത്. രാജ്യത്തിനായി 70 ഗോളുകള്‍ തികച്ച ക്രിസ്റ്റ്യാനോ ഏറ്റവും കൂടുതല്‍ ഗോളുകള്‍ നേടിയ യൂറോപ്പ്യന്‍ രാജ്യത്തെ താരങ്ങളുടെ പട്ടികയില്‍ നാലാം സ്ഥാനത്തെത്തി.
ഫെറങ്ക് പുഷ്‌കാസ് (84), സന്റോര്‍ ക്രോസിസ് (75), മിറോസ്ലോവ് ക്ലോസെ (71) എന്നിവരാണു ആദ്യ മൂന്നു സ്ഥാനങ്ങളിലുള്ളവര്‍.
ഇരട്ട ഗോളുകള്‍ നേടി ഒലിവര്‍ ജിറൂദും ഒരു ഗോള്‍ നേടി അന്റോയിന്‍ ഗ്രിസ്മാനും തിളങ്ങിയ പോരാട്ടത്തിലാണു ഫ്രാന്‍സ് 3-1നു ലക്‌സംബര്‍ഗിനെ കീഴടക്കി വിജയം സ്വന്തമാക്കിയത്.
യൂറോ കപ്പിനു യോഗ്യത നേടാന്‍ കഴിയാതെ പോയ ഹോളണ്ടിന്റെ ലോകകപ്പ് സാധ്യതകള്‍ക്കും തിരിച്ചടി നല്‍കുന്നതാണു ബള്‍ഗേറിയക്കെതിരായ തോല്‍വി.
ഗ്രൂപ്പ് എയില്‍ അവര്‍ ബള്‍ഗേറിയക്കും പിന്നില്‍ നാലാമത്. ഫ്രാന്‍സ് ഒന്നാമതും സ്വീഡന്‍ രണ്ടാമതും ബള്‍ഗേറിയ മൂന്നാം സ്ഥാനത്തും നില്‍ക്കുന്നു.