കൊച്ചി: ഏലം കര്‍ഷകര്‍ക്ക് ഇതുവരെയായി 7.22 കോടി രൂപ സാമ്പത്തികസഹായം നല്‍കിയതായി സ്ഥാനമൊഴിയുന്ന സ്‌പൈസസ് ബോര്‍ഡ് ചെയര്‍മാന്‍ ഡോ. എ. ജയതിലക് പറഞ്ഞു.ഏലം വികസന ഫണ്ടില്‍ നിന്നാണ് തുക അനുവദിച്ചത്. 23,232 കര്‍ഷകര്‍ക്ക് ഇതിന്റെ പ്രയോജനം ലഭിച്ചിട്ടുണ്ട്. ഇടുക്കി ജില്ലയില്‍ ഇതിനകം 20 മുതല്‍ 25 ശതമാനം വരെയാണ് വിളനാശമുണ്ടായത്. അഞ്ചു മുതല്‍ 10 ശതമാനം വരെ ഏലച്ചെടികളും നശിച്ചു. 

കടുത്ത വേനലും വരള്‍ച്ചയുമാണ് വിളയും ചെടിയും നശിക്കാനിടയാക്കിയത്. കാലാവസ്ഥയിലെ മാറ്റവും കൃഷിക്ക് ദോഷകരമായി.
ഇല വിണ്ടുകീറല്‍, പൂ കരിയല്‍ മുതലായവ കാലാവസ്ഥാവ്യതിയാനത്തിന്റെ ഭാഗമായുണ്ടായതാണ്. കൃഷിയിടങ്ങളില്‍ നേരിട്ടുപോയി സ്ഥിതിഗതികള്‍ വിലയിരുത്തിയിരുന്നുവെന്നും അദ്ദേഹം പറഞ്ഞു.