വാഷിങ്ടണ്‍: സിംഗപ്പൂര്‍ ഉച്ചകോടിയെ കുറിച്ചുള്ള ആശങ്കകള്‍ അസ്ഥാനത്താക്കി മുതിര്‍ന്ന ഉത്തര കൊറിയന്‍ നേതാവ് അമേരിക്കയിലേക്ക്.
കഴിഞ്ഞ ദിവസം അമേരിക്കന്‍ ദൗത്യസംഘം പ്യോങ്‌യാങ്ങില്‍ സന്ദര്‍ശനം നടത്തിയതിനു പിറകെയാണ് ഉ.കൊറിയന്‍ വൈസ് ചെയര്‍മാന്‍ കിം യങ് ചോള്‍ വാഷിങ്ങ്ടണിലെത്തുന്നത്. യു.എസ് പ്രസിഡന്റ് ഡൊണാള്‍ഡ് ട്രംപ് നേരിട്ടാണ് ഇക്കാര്യം വെളിപ്പെടുത്തിയത്.
ജൂണ്‍ 12ന് സിംഗപ്പൂരില്‍ നടക്കുന്ന യു.എസ്-ഉ.കൊറിയ ഉച്ചകോടിയുടെ മുന്നൊരുക്കത്തിന്റെ ഭാഗമായാണ് കൊറിയന്‍ പ്രതിനിധി രാജ്യത്തെത്തുന്നതെന്ന് ട്രംപ് ട്വീറ്റ് ചെയ്തു. ഉച്ചകോടിയുമായി ബന്ധപ്പെട്ട വിഷയങ്ങള്‍ ചര്‍ച്ച ചെയ്യാന്‍ മികച്ചൊരു സംഘത്തെ തന്നെ തങ്ങള്‍ സജ്ജമാക്കിയിട്ടുണ്ടെന്നും ട്രംപ് പറഞ്ഞു. താന്‍ അയച്ച കത്തിനുള്ള ഉറച്ച മറുപടിയായാണ് കിം ചോള്‍ വാഷിങ്ങ്ടണിലെത്തുന്നതെന്നും അദ്ദേഹം കൂട്ടിച്ചേര്‍ത്തു.
ഉ.കൊറിയന്‍ ഭരണകക്ഷിയായ വര്‍ക്കേഴ്‌സ് പാര്‍ട്ടി സെന്‍ട്രല്‍ കമ്മിറ്റി വൈസ് ചെയര്‍മാന്‍ കൂടിയാണ് കിം യങ് ചോള്‍. ഇന്ന് ബെയ്ജിങ്ങിലെത്തി ചൈനീസ് വൃത്തങ്ങളുമായി സംസാരിച്ച ശേഷമായിരിക്കും അദ്ദേഹം അമേരിക്കയിലേക്കു പറക്കുക.
2000ത്തില്‍ ബില്‍ ക്ലിന്റണ്‍ പ്രസിഡന്റായിരിക്കെ അമേരിക്ക സന്ദര്‍ശിച്ച മുന്‍ സൈനിക തലവന്‍ ജോ മ്യോങ് റോക്കിനു ശേഷം വാഷിങ്ടണിലെത്തുന്ന ആദ്യത്തെ മുതിര്‍ന്ന ഉ.കൊറിയന്‍ നേതാവ് കൂടിയാകും കിം ചോള്‍. നേരത്തെ യു.എസ് വിദേശകാര്യ സെക്രട്ടറി മൈക് പോംപിയോയുമായി ഉ.കൊറിയന്‍ ഭരണാധികാരി കിം ജോങ് ഉന്‍ നടത്തിയ രണ്ട് കൂടിക്കാഴ്ചകള്‍ക്കും നേതൃത്വം നല്‍കിയ സൈനിക ഇന്റലിജന്‍സ് ഏജന്‍സിയുടെ മുന്‍ മേധാവിയുമായിരുന്നു അദ്ദേഹം. അനിശ്ചിതത്വത്തിലായ ഡൊണാള്‍ഡ് ട്രംപ്-കിം ജോങ് ഉന്‍ കൂടിക്കാഴ്ചയില്‍ പുതിയ പ്രതീക്ഷയുണര്‍ത്തിയാണ് അമേരിക്കന്‍ ദൗത്യസംഘം തിങ്കളാഴ്ച ഉ.കൊറിയ സന്ദര്‍ശിച്ചത്.
ഇരുകൊറിയകള്‍ക്കുമിടയിലുള്ള സൈനിക രഹിത മേഖലയായ പാന്‍മുന്‍ജോം ഗ്രാമത്തില്‍ വച്ച് യു.എസ്-ഉ.കൊറിയന്‍ വൃത്തങ്ങള്‍ കൂടിക്കാഴ്ച നടത്തി. ഫിലിപ്പൈന്‍സിലെ യു.എസ് അംബാസഡറും മുതിര്‍ന്ന നയതന്ത്രജ്ഞനുമായ സങ് കിം ആണ് യു.എസ് സംഘത്തെ നയിച്ചത്. കൊറിയന്‍ വംശജനായ സങ് മുന്‍പ് ദക്ഷിണ കൊറിയയിലെ യു.എസ് അംബാസഡറായിട്ടുണ്ട്. ഉ.കൊറിയയുമായുള്ള ആറംഗ യു.എസ് അനുരഞ്ജന സംഘത്തിലും അദ്ദേഹം അംഗമായിരുന്നു.
അതിനിടെ, മുതിര്‍ന്ന ഉ.കൊറിയന്‍ നേതാവ് കിം ചാങ് സണ്‍ ഉച്ചകോടി നടക്കുന്ന സിംഗപ്പൂരിലെത്തി. ഉച്ചകോടിക്കു മുന്നോടിയായുള്ള ചര്‍ച്ചകള്‍ക്കായാണു സന്ദര്‍ശനം.
ബെയ്ജിങ്ങില്‍ ചൈനീസ് വൃത്തങ്ങളുമായി കൂടിക്കാഴ്ച നടത്തിയ ശേഷമാണ് അദ്ദേഹം സിംഗപ്പൂരിലെത്തിയത്.