തിരുവനന്തപുരം: എ.കെ. ശശീന്ദ്രന്‍ രാജിവയ്ക്കാനിടയായ ഫോണ്‍ സംഭാഷണത്തെക്കുറിച്ച് അന്വേഷണം നടത്താന്‍ സര്‍ക്കാര്‍ ജസ്റ്റിസ് പി.എ ആന്റണി കമ്മിഷനെ നിയമിച്ചു. ഇന്ന് ചേര്‍ന്ന മന്ത്രിസഭാ യോഗത്തിലാണ് തീരുമാനമുണ്ടായത്.

മൂന്ന് മാസത്തിനകം അന്വേഷണം പൂര്‍ത്തിയാക്കണം. ആരാണ് വിളിച്ചത്. എന്തിനാണ് വിളിച്ചത് തുടങ്ങിയ കാര്യങ്ങള്‍ അന്വേഷിക്കും. പുറത്തുവന്ന ഓഡിയോ എഡിറ്റ് ചെയ്തതാണോ എന്നും പരിശോധിക്കും.

അതേസമയം, സംഭവത്തിന് പിന്നില്‍ 'പെണ്‍കെണി' തന്നെയെന്ന നിഗമനത്തിലാണ് പൊലിസ് രഹസ്യാന്വേഷണ വിഭാഗം. പരാതിക്കാരില്ലാത്ത സാഹചര്യത്തില്‍ നടന്ന അന്വേഷണമാണ് ഇത്തരമൊരു നിഗമനത്തിലേക്കെത്തിക്കുന്നത്. ഒരു മാധ്യമസ്ഥാപനവുമായി ബന്ധപ്പെട്ട് പ്രവര്‍ത്തിക്കുന്ന പെണ്‍കുട്ടിയാണ് കെണിയൊരുക്കിയതെന്നാണ് സൂചന.

ഇവര്‍ കുറച്ചുകാലമായി ശശീന്ദ്രനുമായി നിരന്തരം ഫോണില്‍ സമ്പര്‍ക്കം പുലര്‍ത്തിയിരുന്നതായും ഇടയ്ക്കിടെ ശശീന്ദ്രന്റെ ഓഫിസില്‍ എത്തിയിരുന്നതായും പൊലിസിന് വിവരം ലഭിച്ചു. ജുഡീഷ്യല്‍ അന്വേഷണം പ്രഖ്യാപിച്ചതിനു തൊട്ടുപിന്നാലെ ഇവരുടെ ഫെയ്‌സ്ബുക്ക് പേജ് അപ്രത്യക്ഷമായതും ശ്രദ്ധയില്‍ പെട്ടിട്ടുണ്ട്.

കണ്ണൂരില്‍ നിന്നും നിവേദനം നല്‍കാന്‍ എത്തിയ വീട്ടമ്മയുമായാണ് ശശീന്ദ്രന്‍ ഫോണില്‍ സംഭാഷണം നടത്തിയതെന്നായിരുന്നു ആദ്യം പ്രചരിച്ച വാര്‍ത്ത.