പെരിങ്ങത്തൂര്‍: കരിയാട്, പെരിങ്ങത്തൂര്‍, പുല്ലൂക്കര പ്രദേശങ്ങളില്‍ തുടര്‍ച്ചയായുണ്ടാകുന്ന വൈദ്യുതി മുടക്കത്തിനെതിരെ പ്രതിഷേധം വ്യാപകം.
മണിക്കൂറുകളോളം വൈദ്യുതി മുടങ്ങുന്ന സ്ഥിതിയാണുള്ളത്. അറിയിപ്പില്ലാതെ ഉണ്ടാകുന്ന തുടര്‍ച്ചയായ വൈദ്യുതി മുടക്കം നോമ്പുതുറ സമയത്തെ ഒരുക്കങ്ങളെയും അവതാളത്തിലാക്കുകയാണ്. അതിനിടെ ഭാരം കയറ്റിയ വാഹനങ്ങള്‍ വൈദ്യുതി ലൈനില്‍ തട്ടുന്നതാണ് ഇടക്കിടെ വൈദ്യുതി മുടങ്ങാനിടയാക്കുന്നതെന്നും ആരോപണമുണ്ട്. ഇക്കാര്യം അറിയിക്കാന്‍ ഇലക്ട്രിസിറ്റി ഓഫിസിലേക്ക് ഫോണ്‍ വിളിച്ചാല്‍ ഫോണ്‍ പ്രവര്‍ത്തന രഹിതമാണെന്നും പരാതിയുണ്ട്. ഇടക്കിടെയുണ്ടാകുന്ന വൈദ്യുതി മുടക്കം പെരുന്നാള്‍ തിരക്കുകളില്‍ മുങ്ങുന്ന കടകളുടെ പ്രവര്‍ത്തനവും അവതാളത്തിലാക്കുന്നു.
ഇടക്കിടെയുണ്ടാകുന്ന വൈദ്യുതി തടസം അധികൃതര്‍ ഒഴിവാക്കിത്തരണമെന്നാണ് നാട്ടുകാരുടെ ആവശ്യം.