ആലപ്പുഴ: അമിത വേഗതയിലെത്തിയ കാര്‍ ടാങ്കര്‍ ലോറിയിലിടിച്ച് കാര്‍ യാത്രക്കാരായ രണ്ടു പേര്‍ക്ക് ഗുരുതരമായി പരുക്കേറ്റു.
എറണാകുളം എടപ്പള്ളി വിതയത്തില്‍ ടോമി (38), കൊല്ലം ശാസ്താംകോട്ട ചിണക്കല്‍ നിത്യാ നിവാസില്‍ നിബു ആന്റണി (28) എന്നിവര്‍ക്കാണ് പരുക്കേറ്റത്. വണ്ടാനം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ച ഇവരെ പിന്നീട് എറണാകുളത്തെ സ്വകാര്യാശുപത്രിയിലേക്ക് മാറ്റി. ദേശീയപാതയില്‍ കാക്കാഴം റെയില്‍വേ മേല്‍പ്പാലത്തില്‍ ഇന്നലെ പുലര്‍ച്ചെ 6.30 ഓടെയായിരുന്നു അപകടം.
എറണാകുളത്തുനിന്നും തെക്ക് ഭാഗത്തേക്ക് പോകുകയായിരുന്ന കാര്‍ എതിര്‍ദിശയില്‍നിന്നും വന്ന ടാങ്കര്‍ ലോറിയില്‍ ഇടിക്കുകയായിരുന്നു. ഇടിയുടെ ആഘാതത്തില്‍ ലോറിയില്‍ കുടുങ്ങിപ്പോയ കാര്‍, മറ്റൊരു ടാങ്കര്‍ ലോറിയുടെ സഹായത്തോടെ നാട്ടുകാരുീ അപകടസ്ഥലത്തെത്തിയ അമ്പലപ്പുഴ എസ്.ഐ പ്രജീഷ്‌കുമാറിന്റെ നേതൃത്വത്തിലുള്ള പൊലിസ് സംഘവും ചേര്‍ന്ന് വടം കെട്ടി വലിച്ച് നീക്കുകയായിരുന്നു. അപകടത്തെ തുടര്‍ന്ന് ദേശീയപാതയില്‍ ഒരു മണിക്കൂറുളം ഗതാഗത തടസം നേരിട്ടു.