തിരുവനന്തപുരം: ചെങ്ങന്നൂര്‍ ഉപതെരഞ്ഞെടുപ്പില്‍ വിജയിച്ച സജി ചെറിയാന്‍ നിയമസഭാംഗമായി സത്യപ്രതിജ്ഞ ചെയ്തു. ചോദ്യോത്തരവേളയ്ക്ക് ശേഷം ഇന്നലെ രാവിലെ 9.30നായിരുന്നു സത്യപ്രതിജ്ഞ. സ്പീക്കര്‍ പി. ശ്രീരാമകൃഷ്ണന്‍ സത്യവാചകം ചൊല്ലിക്കൊടുത്തു. സഗൗരവമായിരുന്നു സത്യപ്രതിജ്ഞ.
സജി ചെറിയാന്റെ കുടുംബവും ശോഭന ജോര്‍ജ് അടക്കം എല്‍.ഡി.എഫ് പ്രവര്‍ത്തകരും ചടങ്ങ് വീക്ഷിക്കാനെത്തിയിരുന്നു. ചടങ്ങിനു ശേഷം ഭരണപക്ഷത്തിന്റെയും പ്രതിപക്ഷത്തിന്റെയുമടക്കം മുതിര്‍ന്ന സാമാജികരുടെ ആശംസകള്‍ സ്വീകരിച്ചുകൊണ്ടാണ് സജി ചെറിയാന്‍ ഇരിപ്പിടത്തിലേക്ക് നീങ്ങിയത്.
ഇക്കഴിഞ്ഞ മെയ് 28ന് നടന്ന ചെങ്ങന്നൂര്‍ ഉപതെരഞ്ഞെടുപ്പില്‍ 20,956 വോട്ടിന്റെ റെക്കോര്‍ഡ് ഭൂരിപക്ഷത്തിലാണ് ആലപ്പുഴ സി.പി.എം സെക്രട്ടറിയായിരുന്ന സജി ചെറിയാന്‍ വിജയിച്ചത്.