മുംബൈ: കഴിഞ്ഞദിവസം എയര്‍ടെല്‍ ഒരു പരസ്യം നല്‍കിയിരുന്നു. ഇന്ത്യയിലെ ഏറ്റവും വേഗമേറിയ നെറ്റ്‌വര്‍ക്ക് തങ്ങളുടേതാണെന്ന അവകാശവാദവുമായി പരസ്യമിറക്കിയത്. ഇന്നിപ്പോള്‍ ആ പരസ്യം എയര്‍ടെല്ലിനെ തിരിഞ്ഞുകുത്തിയിരിക്കുകയാണ്. ഇന്ത്യയിലെ ഫാസ്റ്റെസ്റ്റ് നെറ്റ്‌വര്‍ക്ക് എയര്‍ടെല്ലിന്റേതാണെന്ന വാദം തെറ്റിദ്ധാരണ പരത്തുന്നതാണെന്ന് കാണിച്ച് റിലയന്‍സ് ജിയോ ഇന്‍ഫോകോം നല്‍കിയ പരാതിയിലാണ് നടപടി. അഡ്വടൈസിങ് സ്റ്റാന്റേര്‍ഡ്‌സ് കൗണ്‍സില്‍ ഓഫ് ഇന്ത്യയുടേതാണ് നടപടി. ഏപ്രില്‍ 11 നകം ഇതു തിരുത്തണം എന്നാണ് നിര്‍ദേശം.

ഉത്തരവിനെതിരേ അപ്പീല്‍ നല്‍കുമെന്ന് ഭാരതി എയര്‍ടെല്‍ മേധാവി സുനില്‍ ഭാരതി പറഞ്ഞു. ആഗോള ബ്രോഡ്ബാന്റ് ടെസ്റ്ററായ ഓഖ്‌ലയുടെ കണക്കുപ്രകാരം എയര്‍ടെല്‍ ഏറ്റവും വേഗമേറിയ നെറ്റ് വര്‍ക്കാണെന്നായിരുന്നു പരസ്യത്തില്‍ പറഞ്ഞിരുന്നത്. ഓഖ്‌ലയുമായി ഒത്തുകളിച്ച് ഇങ്ങനൊരു പട്ടികയുണ്ടാക്കുയായിരുന്നുവെന്നാണ് ജിയോ ആരോപിക്കുന്നത്.