ഹൈദരബാദ്: കൊവിഡ് 19 വ്യാപനത്തില്‍ അപ്രതീക്ഷിത വര്‍ധനവ് ഉണ്ടാക്കിയത് തബ്‌ലീഗ് ജമാഅത്ത് ആണെന്ന വാദത്തിനെതിരേ രൂക്ഷ വിമര്‍ശനവുമായി ആന്ധ്ര മുഖ്യമന്ത്രി ജഗന്‍ മോഹന്‍ റെഡ്ഡി. കൊവിഡ് 19 വര്‍ധനവില്‍ ഒരു പ്രത്യേക മതവിഭാഗത്തെയും സമ്മേളനത്തെയും കുറ്റപ്പെടുത്തുന്നത് ശരിയല്ലെന്നും അദ്ദേഹം പറഞ്ഞു. ഡല്‍ഹിയില്‍ തബ്‌ലീഗ് ജമാഅത്തില്‍ സംഭവിച്ചത് ദൗര്‍ഭാഗ്യകരമാണ്. 

ഇത്തരം സംഭവങ്ങള്‍ എവിടെയും സംഭവിക്കാന്‍ സാധ്യതയുള്ള കാര്യമാണ്. നമുക്ക് നിരവധി  മത നേതാക്കന്മാരുണ്ട്. ശ്രീ ശ്രീ രവി ശങ്കറിന്റെ ആര്‍ട്ട് ഓഫ് ലിവിങ് സമ്മേളനം, ജഗി വാസുദേവിന്റെ ഇഷാ ഫൗണ്ടേഷന്റെ പ്രാര്‍ഥനാ യോഗങ്ങള്‍, മാതാ അമൃതാനന്ദ മയി, പോള്‍ ദിനകരന്‍, ജോണ്‍ വീസ്‌ലി എന്നിങ്ങനെയുള്ളവരെ പിന്തുണയ്ക്കുന്നവരുടെ സമ്മേളനത്തിന് ഇടയിലും ഇത് സംഭവിക്കാന്‍ സാധ്യതയുളള കാര്യമാണ്. തബ്‌ലീഗ് ജമാഅത്തിനിടയില്‍ സംഭവിച്ചത് നിര്‍ഭാഗ്യകരമാണെന്നും ജഗന്‍മോഹന്‍ പറഞ്ഞു. 

കൊറോണ വൈറസ് ബാധിക്കുന്നതിന് ജാതിമത വ്യത്യാസമില്ല. മരുന്നുമില്ല. പാവപ്പെട്ടവനും പണക്കാരനുമെന്ന വ്യത്യാസമില്ല. രാജ്യ വ്യത്യാസമില്ല. നമ്മുടെ യുദ്ധത്തിലെ എതിരാളി അദൃശ്യനായ വൈറസാണെന്നും ജഗന്‍ മോഹന്‍ റെഡി പറഞ്ഞു. ലോകം തന്നെ കൊവിഡ് പ്രതിസന്ധിയിലായിരിക്കേ ഇത്തരത്തിലുള്ള വിവേചനം കാട്ടരുതെന്നും ജഗന്‍ പറഞ്ഞു.